Ka seiñ JSU hadien wa da yachem ko ya u DC ka East Jaiñtia Hills ynne ka sngi da yoh ko yei pynche heiyatoh wa ka Meghalaya Pollution Control Board (MSPCB) kawa da thoh cha ka sorkar pyrdi wow yoh Environmental Clearance ka Star Cement na ka MoEF&CC.
Ka seiñ da chem ko wa lyngba u Member Secretary ka MSPCB da thoh ko cha ka Ministry of Environment, Forest & Climate Change (MoEF&CC) wow e ya ka Environmental Clearance ya ka Star Cement.
Neiliang u DC ka District da pynche u wa ka chithi kawa da thoh da u Member Secretary toh kawa ha ka 3 Wisu (Mar) 2020 heiwa da thoh u cha ka MoEF&CC wa cha u DC ka East Jaiñtia Hills District heiwa da pyntip u wa i thmu wow pynman Public Hearing da man i iwa sepai la ar sien wei uni u heh ka MSPCB da kyrpaad u wow lai lait noh na ka Public Hearing na ka MoEF&CC deiwa pynemkaam noh da ka para 7(i) 3 clause (v) yong ka EIA 2006 wow e laad ya ka Star Cement wow yoh suk ya ka Environmental Clearance khlem emkaam wow pynsñiaw paidbah namo ka Public Hearing wow tih suk ya u moochuni na Brichyrnot ha i thaw wa heh kamwa 42 Hectare.
Ka seiñ da kylli ko na u montri rangbah kammon e pynche u ya ki paidbah hawa ka sorkar emkti ko wow e bor lyngba ka MSPCB ya ka Star Cement wow yoh ya ka EC na ka MoEF&CC na Delhi.
Ka JSU leh dap ko dei chrai wa ka sorkar jylla da leh embor ko deiwa yoohbeiñ ya i sur u paidbah wa i hok mantre khyndaw kam ka jaitbru wa kyrpang lyngba ka 6 Schedule ka Autonomous District Council.
Ka seiñ da kylli ko leh ya ka JHADC heiwa kammon suki ko kiaw ya kani ka phang wei kammon ka Brichyrnot yoh bor ko wow e NOC khlem yoh bor na ka JHADC.
