Ka chnat Mining & Geology ka sorkar Meghalaya da e bor ko wow chalan ya u mooyong wa wan na baar ka jylla yow phah cha baar ri lyngba ka Borsora, Cheragaon wa Bagli Land Custom Station (LCS).
Ha ka chithi wa da phah da u Secretary ka chnat Mining & Geology cha ka DC ka South West Khasi Hills District ha ka 12 tarik uni u bnai da ong wa heiyatoh wa ini i kaam iwa da dep yaklam ha ka chithi kawa da phah ha ka 01-12-22 da e u bor wow chalan ya u mooyong hadien wa da dep wow lai pynsakhiat katwon em u mooyong, i thaw wa em u (GPS Coordinates), ki kot ki sla wa psiah chapoh ka jylla wa kiwi de kam ki Purchase Bill, e-way Bill wa kiwi kiwi de.
Hadien wa da dep leh yeini da chem u mooyong toh uwa em 38,016 MT heithaw 39,937 MT uwa da wan na baar jylla wei da chah wow chalan ya uni u mooyong wa 38,016 MT lyngba ka Borsora, Cheragaon wa Bagli Land Custom Station (LCS).
Chooh chooh da pyntip wa neidaw wa i dai lilam ya u mooyong da ka Coal India Limited (CIL) daw sdang noh i hapoh ka District, kamtæ i e por wa 60 sngi wow chalan ya uni u mooyong da pynduna noh cha 15 sngi deiwa kheiñ nadooh ka 14 tarik uni u bnai yow pyndep noh ya ini waroh katkam ki kyndon wa da booh da ka sorkar Meghalaya.
