U Ernest Mawrie uwa man leh u President yong ka seiñ BJP hapoh ka jylla Meghalaya, da ong u wa kam ka Party, daw hap ko wow e dei sneiñ ya kiwon ki dkhot yong ka seiñ kiwa lai næ klam palat ya u pood wa man katkam ki kyndon krehkaam yong ka Party ha i jooh i por pyntip u wa da yoh bor wot na kiwa yahkhmat yong ka Party na Delhi wa oo ye u wot wow beh noh syndon ya ki na ka seiñ hajrong ki kaam palat pood lane kiwa lai lait na ki kyndon yong ka riti krehkaam ka Party.
Chooh chooh u Ernest da pynrap u wa ya kani ka hukum, da yoh leh ya i phah wot nadooh kiwa yahkhmat ka Party na Delhi, kawa da maham ya kiwon kiwon ki dkhot næ kiwa kitkaam yong ka Party wa ym ye ki wow klam hi-eh lane wow pynsñiaw pyrchah ya kiwon kiwon ki phang næ ya kiwa yahkhmat.
Hawa yaklam wa ki laad pathai khubor, u Ernest da pynsñiaw u wa neipor cheipor da jooh mih bha itæ i sur wa ki dkhot ka Party hapoh ka jylla ym sñiawsuk de ki ya oo wow ksoh u kam uwa yahkhmat ka Party hapoh ka jylla.
U Ernest da kyntu u ya kam kitæ ki dkhot ki wym sñiaw yahap yumut wa oo, toh u lai ki yow yaklam wei wow ya pynbiat markhmat wa oo, tangwa sñiawsih u wow yoo wa lai pathan ki yow pyntip cha ki laad pathai khubor.
Hawa yatoh wa ini, u Ernest da pyntip u wa ynnin ka sngi, da em ka yalang ha Guwahati heiwa da pyntip u wa hajrong ini i jia iwa da poi leh chadooh utæ u pood wa da ktah yei man samen wei neiliang kiwa yahkhmat ka seiñ kiwa emlang napoh Delhi da e bor ki ha oo wow paan pynche na kini ki dkhot wa lada ym ye ki wow batai bniah ya itæ wa dawa wa da booh hakhmat yong ki, ye u poi chadooh u pood wow chah beh seiñ ki.
