Ka Education Cell ka KSU-CEC da phah dorkhat ko cha u Vice Chancellor ka NEHU, Shillong heiyatoh ka puræ puthi ha kani ka skurbah iwa da sngeh katni neidaw ka khlam COVID-19 iwa da ktah ya kiwa puræ puthi wei heijooh i por leh da ong wa ym toh wow lehstiñ manda wai biang ya kani ka thaw puræ yow yada ym du ya kiwa lai puræ kamjooh ya ka jylla waroh kawi.
Ka seiñ da ong ko wa da sñiawkhia ko ya kiwa lai puræ kiwa yaleh yaka Final Semester kiwa daw chong yaleh yaka Final Exam kiwa em 787 ngut na kiwa boon ki chnat puræ heiwa 200 ngut toh kiwa na Meghalaya , 300 ngut kiwa na Assam, 100 ngut na Nagaland, 60 ngut kiwa na Mizoram, 50 ngut na Manipur, 25 ngut na Arunachal Pradesh, 20 ngut na West Bengal, 10 ngut na Tripura wa Bihar, 5 ngut na Jharkhand wa Uttar Pradesh, 1 na Odisha wa 1 na Nepal.
Kamtæ ka seiñ da sñiaw ko wa lada wai biang yaka University daw chah ya kiwa na baar wow psiah ki chapoh ka jylla iwa daw booh hei maa ya kiwa chong chnong ka jylla iwa da chem na iwa ku kiwa yoh COVID-19 hapoh ka jylla iwa wanrah da kiwa liwan na baar jylla. Wei ini daw pynkhia ko yaka yukit yaka University wow pynbiang ya iwa emkaam.
Ka KSU da e buit ko wow ya krehlang ka NEHU wa kiwi ki skurbah yow ye kiwa em cha kiwi ki jylla wow thoh Exam pyn hapoh ka jylla wa em ki wei yaka Answer Script wow phah won ki cha ka NEHU.
Da ong leh wa ye u pynman yaka Exam deiwa phah yaki Assignment, ye leh wow pyndam yaki Exam kamwa da leh ha Maharashtra wei wow kheiñ daki Marks wa yoh haki Semester wa nachwa.
Heiyatoh won wa kiwi ki Semester kiwa dang khian, ka KSU da ong ko wa yaki Exam ye u pyndam chwa hadooh wa poi i por wa biang lane deiwa bood yaki buit wa da e wa yatoh wa kiwa em haka Final Semester.
