Ka seiñ kiwa kamai thuk-thuk kawa tip kam ka Two Wheelers Taxi Association (TWTA) da yachem ki wa u Commissioner and Secretary ka chnat Transport yow kyrpaad wow chah biang u kamai ki kat wym pu e da ki Permit wa thymme.
U General Secretary ka TWTA, u Khrawkular Mawkhon da ong u wa boon na kiwa kamai toh ki khynroo khyllood kiwa da imja neini la kattu katni por wei ini i khang syndet da ktah ko ya ki cha wa palat.
Da kdaw u leh wa kiwa boon na ki toh kiwa da chim da ka ram yow thied ya kini ki thuk-thuk wei kattæ da pyndiaw mynsien ko ya ka mynried yong ki neidaw wym tip de ki kammon wow su ya ka ram.
Kamtæ da ong u wa kat wym pu pynmih hukum ka sorkar da kawa pura neibynta i kamai ki ar chaka, toh u pynmih chwa da ka hukum kawa chipor yow e laad u kamai biang ki.
Ka aiñ Meghalaya Taxi Aggregator Operational Rules, 2020 toh kawa e bor du ya kiwa kamai kari hapoh i pyrtuid ka Company kamtæ da dawa wow chah leh ya ki bru samen kamjooh ki SHG lane ki Co-operative wow leh ki yeini.
Chooh chooh da ong leh wa ka sorkar toh u yarap ko ya ki seiñ yow suk ki bru wow phah wan kit bru kawa yahaap wa i man i thaw cha i wei kamjooh yow booh thaw pynyieñ thuk-thuk ya ki.
Ha kawi won ka liang, ka chnat Transport da rai ko leh wow wanrah ya ki kyndon neibynta ki Rapido Bike katkam wa pyntip da u Montri ka chnat, u Dasakhiat Lamare uwa da pdiang u wa ini i khang yei kamai thuk-thuk da ktah ko yei khih i khan ki khynroo khyllood.
Tangwa da ong u wa da em i ood na kiwa kamai Taxi wa ym yoh bru kamwa jooh naddooh neidaw wa em ki Bike-Taxi. Wei neiliang ki paidbah won da yoh myntoi ki yow lait nei sahkut kari wei rap duna leh ka bai kari.
Da pynche u leh wa kiwa kamai Taxi ym em kwah ki wow khang ya kiwa kamai da ki thuk-thuk tangwa kwah hi-eh ki wym toh u chah ktah wei ka sorkar dang yaleh ko wow pynhun deiwa myntoi ki waroh arliang.
