Ka Angela Rangad hajrong i kynthih seiñ kiwa mihkhmat paidbah na kawi cha kawi ha kini ki sngi ki tayaw wa da dep deiwa e daw toh neibynta i bha i miat ki paidbah, tangwa ka Angela da ong ko i daw sakhiat hi toh yow yoh myntoi wa i khwan samen.
Da ong ko leh ki bru kiwa leh ya kini ki kaam toh ki wym em yurim kiwa ym ye wow e jubab lait noh deiwa ong hi-eh “No Comments” neibhah ym ye ki wow pynche wow khana dei sakhiat neibhah wym em i bha i miat neibynta ki paidbah.
Heiyatoh wa i tih mooyong pyrchah ya ka aiñ, ka Angela da ong ko wa boon snem da klam yeini neibhah ini da man kamwa tooh ya ka poisa u paidbah kawa ye wow pynemkaam yei bha i miat nadooh i chait i khiah, ka puræ puthi, u pynchna sarok wei wow pynmih ya ki kaam ki jaam tangwa da sukhi hi-eh ki ya ini i kaam nadooh kiwa kyrchaan sorkar neidaw wa ki waroh ya emkti lang ki wow khayi pyrchah aiñ ya u mooyong.
Tangwa katni won da sdang ki wow klam chaphang u mooyong du neidaw wow myntoi yong ki samen wei wow pynkulmar ya ki paidbah yow sñiaw wa ki toh ki angel wei klam ki pyrchah ya ki kaam wym man.
Da ong ko leh wa lada jia i yap i mynsoo na kini ki kaam pyrchah aiñ toh u kdawkti bait cha kitu kiwa emkti lang ha kini ki kaam. Neibhah kitu kiwa em ha ka liang pyrchah katni da ong ki wa ym ye ki wow leh iyi iyi tangwa ka Angela da ong ko wa ini toh i thok i chukor neibhah lada leh hi ki yei kaam wa da pynkit ha ki ym em wa ye u khang ki.
Da kdaw ko leh ya ka yarap poisa wa e heipor ka khlam COVID-19 wa ym em uwa mihkhmat wa wan wow klam wow kylli chaphang kani kawa toh u yoh myntoi ki paidbah.
“Lada kamni cheiwon ka mynried neibhah ya ki khon pynchitom i ya ki lada thok ki wei iyi i daw wym ye u leh i jooh ya kiwa mihkhmat yow yoh ya ka mynried wa thymme,” da ong ka Angela.
