Jowai: Ka Jaiñtia Student Movement-Central Body ynnin ka 5 tarik da e dorkhat ko ha u montri rangbah ka jylla, u Conrad Sangma wow dawa wow chna ya ka Civil Sub-division hapoh ka Laskein C&RD Block, West Jaiñtia Hills District deiwa ong wa ki chnong wa em hapoh kani ka Block toh kiwa em cha ki thaw wa jngai naka yungkrehkaam u DC wei lada em da ka Civil Sub-division daw yarap ko chiboon ya ki paidbah.
Ka seiñ da ong ko hapoh kani ka Block da em hadooh 100 tylli ki chnong wei ki bru da em ki aw jan dap chi lak ngut wei hapoh kani ka Block da em leh ki chnong Khatkasla, Psiar, Moolber wa kiwi ki chnong hapoh ka Block-I kiwa man ki thaw wa ya khajia ka Assam wa ka Meghalaya.
Ka seiñ leh da dawa ko wow booh ya ka Police Outpost ha chnong Psiar neidaw wa joor i chah lehbeiñ ki bru Pnar ha ki pulit ka Assam hadooh waka sorkar Assam da pyrchang ko la le sien wow chna ya ka Police Outpost ha Khatkasla.
Ha ka chnong Lakadong kawa haap hapoh ka Lumshnong Police Station waka chnong Huroi kawa haap hapoh ka Khliehriat Police Station toh kiwa jngai na ki Police Station yong ki kamtæ deiwa booh ya ka Police Outpost daw yarap ki ya ki paidbah wow smat u e ya ki FIR.
Ka seiñ leh da pteiñ ko yei dawa wow yoh ya ka Government College deiwa ong wa i haap lai puræ ki khynnah cha Jowai man ko kawa lutsan wa haap su ya ka bai yungwai wei da ban joor wa kwah da ka College wa pura ymtoh da ka Community College.
Discussion about this post