Ka JSU-CB ynne ka sngi hapoh i yahkhmat u General Secretary ka seiñ, u Jersom Shylla da lai e dorkhat ko ha u Deputy Commissioner ka West Jaiñtia Hills hajrong wow phah ya ki dukan waroh nadooh ki dukan cha, ki Retailer wa ki Wholesaler wa em hapoh ka District wow booh Register ki, ki thaw saitkti namo ki Hand Sanitizer weiwa ki tre dukan waroh toh u sap ki ya ki Mask khnang wow ye u yada na i poor u khñiang COVID-19.
Ka seiñ da ong ko leh wa wot hadien wa ka yung krehkaam u DC da pynmih hukum ko hajrong ini ha kini ki sngi wa da dep, ka seiñ da chem ko wa dang boon ki dukan wa ympu em bood ya kani ka hukum.
Ka seiñ da kyntu ko ya waroh ki paidbah wow krehlang khamtam ha kini ki por wa kani ka kjut dang poor ko wei da kyrpaad ya waroh ki dukan wow booh Register ki deiwa thoh ya ki pyrtuid, i thawsah wa ki Number Phone khang wa lada jia iwon iwon wa em wa yoh kjut yow pynsuk ya ka chnat i chait i khiah hawa booddien namo leh ki ya ka Contact Tracing.
Ha iwi i liang ka seiñ da yaklam ko wow DC heiyatoh wa kiwa yah kari wa ki wakreh ka 108, yei thaw sah yong ki khamtam wa man ki kiwa hakhmat wow kit ya ki bru wa yoh COVID-19 wei neiliang yong oo da pynsñiaw u wa da pynkhreh hi ka sorkar ya ki thawsah neibynta yong ki.
Ka seiñ leh da kular ko wow krehlang wa ka sorkar heiyatoh wow khoom u kdoh yei poor uni u khñiang.
Da pynkut ka wyrta na u Publicity Secretary ka seiñ, u Tricky Mukhim.
