Shillong: Ka JSU-Central Body hapoh i yahkhmat u President yong ka u Lawyerson War chirup wa u President ka Shillong Circle u Treiborlang R. Suchen ynne ka sngi da lai yachem ki ya i montri ka PHE, u Samlin Malngiang heiwa da ekti leh ya ka dorkhat neibynta le tylli ki mat.
Kini ki mat kynthup ki yei em du kawi ka Electrical Division ha ki ar tylli ki District hapoh East wa West Jaiñtia Hills; ka Jowai Greater Water Supply wa ka Raliang Greater Supply wa ka kaam (post) Engineer kiwa phær waphær kiwa em hadooh 15 tylli kawa sahteiñ hawa ka MPSC hadooh katni ympu em khut ko ya ka interview neibynta kini ki kreh Assistant Engineer Civil -7 tylli, Assistant Engineer Electrical 7 tylli wa kawi ka Assistant Engineer Mechanical.
U montri da ong u wa ya ka Electrical Division hapoh Jaiñtia Hills ka sorkar daw wai noh ko ya ko sa kawi ha East Jaiñtia Hills District wei kani ka yung krehkaam daw booh ha headquarter ka district ha Khliehriat.
Da pynrap u leh wa ka mat wa ar i daw wa sahteiñ toh nadooh u snem 2011 neidaw wa suki ki contractor, wei da yoo emkaam wow pyndam ya u contractor, wei wow khut tender thymme katwa ya ka Jowai Great Water Supply u montri da ong u wa daw wai noh ya ka ha u Kmaichonglad yong uni u snem. Heiyatoh wa ka mat wa le won neiliang u montri da ong u wa daw yaklam u wa ka MPSC wow pynsmat noh yei kaam.
Neiliang ka seiñ da sñiawngooh ko ya u montri wa da chimkhia u ya kini ki mat wei da dawa ko wa ka sorkar toh u pyndam noh ko ya u contractor uwa da pynsuki yei kreh ha ka Raliang Greater Water Supply wei wow khut tender noh da kawa thymme.
Da dawa ko leh wa ka MPSC toh u khut interview noh ko ya ki 15 tylli ki kaam wa lait.
Discussion about this post