Jowai: Ka Khasi Student Union (KSU) Iooksi Unit da lai e dorkhat ko ha u montri ka chait ka khiah u AL Hek wow pyntip cha oo yei duna ki bru wa kreh hapoh ka PHC Iooksi West Jaiñtia Hills District.
Ha ka dorkhat da ong wa ka Iooksi PHC toh kawa pait ya kiwa boon tylli ki chnong ki dong kawa em ha ka thaaiñ khappood wa ka Assam. Wei i em yong kani ka PHC toh kawa yoh myntoi wa kyrkhu ya ki paaid chong chnong yong ka dong ka thaaiñ hi waroh kawi.
Tangwa kamwa man katni, kani ka thaw sumaar ym em Doctor ko kattu palat 3 bnai na i daw wa u Doctor wa jooh pait ya katai PHC da lai pyndep u ya ka puræ bniah (Specialist) kawa chimpor 4 snem.
Ini wa ym em Doctor ha katai ka PHC da booh ko ya ki paidbah kiwa wan chah sumaar ha katai ka PHC hei eh. Kamtæ heiwa yatoh wa kani ka kaam, ka seiñ da kyrpaad ko ya u montri wow pynyoh 2 ngut ki Doctor ha Iooksi PHC khnang yow ye ki u e ka chakri kawa bha chooh chooh yaki paidbah ka thaaiñ.
Ka seiñ da pynsñiaw ko leh yei duna ki Staff Nurse wa ki ANM (Auxiliary Nurse Midwifery) kiwa toh u em ha katai ka PHC. Kamwa man katni em 4 ngut ki Staff Nurse wa kawi ka ANM tangwa neidaw wa boon kiwa chong chnong yong kani ka thaaiñ kiwa wan chim dawai kamjooh kiwa phah sumaar, da booh ko hei eh ya ki wakreh wow ye ki u leh wow pynbiang lut. Kamtæ sa chisien da kyrpaad ko wow sñiawbha u pynyoh sa 4 ngut ki Staff Nurse wa sa kawi ka ANM.
Da pyntip leh cha u montri wa ym em leh ka kaam wa lait wow thung ya ka PHN (Public Health Nurse) hapoh ka PHC Iooksi.
Neiliang u AL Hek da kular u chimkhia wei daw pyntikna u wow pynyoh uwi u Doctor ha katai ka PHC wei daw phah yaka yung krehkaam u DHS wow chimkhia ha yatoh wa kiwi ki dawa yong ka seiñ.
Ka seiñ da ong ko wa daw booddien ko ya kani ka kaam wei daw phah leh cha u MLA u Nujorki Sungoh.
Discussion about this post