Ki dkhot u KSU wa kynthup ya u Donald V Thabah (General Secretary, KSU CEC), u Raymond Kharjana (Education Secretary, KSU CEC), u Iashan Borlang Mukhim (Assistant Organising Secretary, KSU CEC), Lambok Rymbai (General Secretary, KSU North Khasi Hills District Unit), Augustine Nongbri (Finance Secretary, KSU North Khasi Hills District Unit) deilang wa u Vincent Pala (MP, Lok Sabha) wa u Banteidor Lyngdoh (Minister Agriculture, ka sorkar Meghalaya) da yachem ki ya u Narendra Singh Tomar (Union Minister of Agriculture and Farmers’ Welfare) ynnin ka sngi ha Guwahati hajrong i kaam wa yatoh wow booh yaka Central Agricultural University ha Kyrdemkulai, Ri-Bhoi District, Meghalaya.
Ka KSU wa u Banteidor da e ki jar jiar ki dorkkhat hajrong i jooh i kaam ha u Montri ka sorkar pyrdi.
Neiliang ka KSU da pyntip ko wa katkam i rai yong ka sorkar pyrdi warim toh wow kyrriah noh yaka CAU cha kawi won ka jylla iwa ka sorkar katni leh da bood ko ya ini i jooh.
Da pyntip u leh wa hanla da dep wow yoh yei thaw ha Kyrdemkulai iwa heh hadooh palat 200 Acre da ka sorkar pyrdi, dang chim bait yei rai wow pyndam u booh yaka CAU ha Meghalaya.
Ka KSU hajrong ini da ong ko ya u Montri wa ini i wym yoh ka jylla yaka CAU daw pyndooh ko yei laad kiwa boon kiwa kwah wow lai puræ ha ki kaam wa yatoh waka rep ka riang iwa daw yarap kylla ya ki warep ka jylla.
U Montri hadien i yaklam wa bniah, da kular u wow chimkhia ya ini i kaam. Ka KSU da dawa ko wa toh u booh hi yaka CAU ha i thaw wa da yoh heiwa u Montri da ong u wa daw rah u ya ini i kaam cha Delhi.
Neiliang u Vincent Pala da ong u wa katni ka CAU da em ko du ha Manipur donhi, kamtæ da emkaam jhan wow booh yaka CAU ha Meghalaya kawa man kawa biang dooh neidaw wa da dep wow yoh leh yei thaw. U Banteidor da pyntip u wa da dep u wow yachem wa kiwa boon ki sahep sorkar ha kiwa boon ki kyrdan wei da kyrmen u wa daw yoh hi yaka CAU hapoh ka jylla.
