Ka Hynniewtrep Integrated Territorial Organisation (HITO) da lai booh ko da ka FIR ha u SP ka West Jaiñtia Hills District ha ka 22 tarik uni u bnai pyrchah ya ka khyrdop ka Jaiñtia Hills Autonomous District Council (JHADC) wa em ha Khliehtyrchi wa pynlai da ka Ridalin Law kam ka Agent wa da thung ka JHADC nadooh u April 2024 neibynta ki le snem.
Ka seiñ chwa wow lai e FIR da booh ko da ka RTI ha ka JHADC yow kylli ya ki kyndon wa da pynkrehkaam ya kani ka khyrdop heiwa da yoh jubab wa kani ka khyrdop toh yow kynreh ya ki kari yong ki Non-Tribal kiwa kamai wa khayi pateiñ hapoh u pood u ang ka Council khlem da biang ki kot sla kam ka Trading License wei lada chem kam kini ki kari ka kuna man ko Rs. 200 kawi ka kari deiwa em u Officer ka JHADC wow pait yeini.
Tangwa da em ka kyndon wa khang wow kynreh ya ki kari wa wan na baar jylla kiwa lai luti donhi napoh u pood u ang ka Council hanla man ki ki kari wa kamai wa khayi pateiñ neibhah kini ki kari ym emkaam ki ya ka Trading License.
Hajrong ini, ka seiñ ha ka 21 tarik uni u bnai da chem ko wa ki kari kiwa wan na Guwahati yow lai cha Silchar, Tripura wa Aizawl ki wym emkaam ya ka Trading License da hap ki wow su kuna ha kani ka khyrdop ka JHADC wa em ha Khliehtyrchi, West Jaiñtia Hills.
Ka seiñ da ong ko wa ki kari wa da hap wow su ya ka kuna ha kani ka khyrdop toh kiwa biang ya ki kot ki sla kam ka Consolidated E-Way Bill wa pynyoo wa wan ki na Changsari, Assam yow lai cha Agartala, Tripura wa cha Aizawl, Mizoram iwa mut wa da tyngkhieñ kani ka khyrdop ya ki kyndon wa da booh ka JHADC.
Ka HITO da ong ko wym em leh chem ya u Officer ka JHADC wa toh u em heini katkam ka kyndon wei sa kawi na ki kyndon wa da booh toh wa lada tyngkheiñ kyndon kiwa pynlai ya ka khyrdop daw chah pyndam noh kani ka soskular kawa da yasoi wa ka JHADC.
Ha ka RTI da e jubab leh wa ka poisa wa da ye u pynmih na ka khyrdop wa em ha Khliehtyrchi wa Sonapur dapoi ko Rs. 1,11,22,398 nadooh u April 2024 hadooh ka 31 tarik u March 2025.
Kamtæ ka seiñ da ong ko wa ka JHADC ymtoh u stang poisa ko tangwa ini waroh toh da jia neidaw wym ye u pynlai ya ki khyrdop lum dan da ka hi heiwa da e wai pathan cha ki bru samen iwa man du i buit yong ki kattu katni ngut ki MDC ka liang synchaaar kiwa kwah wow kamai samen hei pyrtuid ka JHADC katwa ka Council won kat dang lai i por da riñsti ko.
Ka seiñ da ong ko leh wa em ki sakhi sabut kiwa biang wow pynsakhiat yei emkti ki MDC ka liang synchaar ha ini i kaam baam tooh wei daw poi i por wa daw sai madan lut ya waroh yeini, da ong u Wanbun N Dkhar, General Secretary ka HITO.
Discussion about this post