Hadien wa da pynpoor ya iwi i Live Video ha kini ki sngi wadep yong kawi ka kynthai Khasi wa sah ha Bengaluru heiwa da chah beiñ ko ha kiwa boon yei rukom im ko, da pynman ya uwi na ki bru wakreh mon sñiawbha, u Kyrsoi Pyrtuh wow e FIR u ha ki pulit pyrchah ya kini kiwa da pynchitom ya kani ka bru da ki kyntien wa pynmong wa ktah yei pyrkhat pyrdaiñ yong ka.
Ha ka FIR da ong wa ki kaam kam kini kiwa man pyrchah ya ki kynthai da joor bha ki hapoh ka jylla wa haka imlang sahlang hanla em ki aiñ wow yada yei burom ki kynthai hadooh ya iwa jia hapoh ka Internet heiwa kiwa emkti ha ini i kaam da muja pathan ki wow leh yeini khlem tieñ ya ka aiñ.
Da e nongmuna yeini wa jia ya kani ka kynthai kawa da hap wow maad ya chiboon ki chah klam khlem akor, i chah klam beiñ, i chah tynjooh wei katni ye u man kawa da hap im deiwa chitom i bor pyrkhat pyrdaiñ iwa daw ktah kylla ya ka mynstep ka mankawi yong ka hadooh i khih i khan yong ka.
Da ong wa kamwa sñiawthooh wa nyngkong ya kani ka Live Video da yoh wow pait da kiwa bood ya ka (Followers) tangwa da pynpoor ya ini cha kiwa boon ki rynsan Social Media iwa da man leh pyrchah yei hok yong i im samen yong ka (Right to privacy).
Kamtæ da ong wa i jied yong ka kammon wow im ko man i i hok yong ka hi wei iwa leh ki bru da ktah i yei burom yong ka.
Kamtæ da kyrpaad ya ki pulit wow thooh kiyi wa sdang nyngkong wow pynpoor ya ini i Video wei wow pynchitom ya ki.
U Kyrsoibor da ong u leh wa waroh em i yei hok wow mynjur lane wym mynjur lada sñiaw wa iwa leh wa iwa ong ko da ktah ko ya kiwa boon tangwa ym em yurim won wow sneiñ wow kroo iyi wa hoi wa iyi wym hoi u leh ko.
