Ka Langsning FC da e ko yei rem ya ka Rangdajied United FC ha ka sien nyngkong ha ka Shillong Premier League nadooh u snem 2018 ha ka yalehke wa da pynman ynne ha Third Ground, Polo Shillong.
Ka Langsning da jop ko da 2-1 da ki kool wa thap u Kitboklang Pale (22’) wa u Shano Tariang (79’) katwa ya ka Rangdajied da thap da u Donboklang Lyngdoh (71’).
Chwa ynne, ka Rangdajied da em ko 5 Point deiwa jop chisien wei ya dron ar sien katwa ka Langsning da yoh ko 4 Point na ki le tylli ki yalehke.
Ka Rangdajied ym em rem ko chisien leh ha ka samoi 2019 ka SPL deiwa jop san sien wei ya dron ynñiaw sien wei da rem khaddooh ko ha ka 24-10-18 ha ka Shillong Lajong FC.
Ka Langsning kattu da yoh ko 7 Point iwa man ar Point hadien ka Ryntih wa ka Mawlai. Da ini i rem ka Rangdajied da hiar ko chei wa san deilang waka Nangkiew Irat kiwa da yoh mar 5 Point tangwa da tam ka Nangkiew deiwa kheiñ da ki kool wa yoh u thap (5 la 3).
Ka yalehke wa bood u pynman ha ka 9 tarik kawa man leh ka yalehke wa khadooh ka Fourth Round hapyrdi ka Mawlai SC wa Malki SC hepor 4:00 waje i sngi.
