Khliehriat: Kam chibynta wow pynsmat yaka chnat MeECL wow pynyoh bordiñ ya kiwa chong chnong ka Ladrymbai, dong Khliehdupon, East Jaiñtia Hills kiwa da chah iehbeiñ da jan dap ar snem kattu.
Ynne ka sngi u President ka Meghalaya People United Front (MPUF) Khliehriat Circle hei emlang u Vice President u S. Bareh waki dkhot yong ka da lai e ki da i thoh ha u Excutive Engineer u H. Yakai ha yung krehkkaam yong oo ha Moowakhu, East Jaiñtia Hills uwa toh u pait ya chnong Ladrymbai heiyatoh wa i bordiñ.
Ha i yaklam ka seiñ wa utai u sahep da ong u wa neiliang yong oo wym tip u hajrong ini i kaam wei ym jooh em wa wan pyntip cha oo lait na ini i wan yong ka seiñ, da kular u leh hakhmat yong ka seiñ wa ha kini ka kajiak sngi wow wan wa daw lai sylli u yow ye u leh yeiwa emkaam neibynta i bha i miat yong u paidbah ka District waroh kawi.
Neiliang u Blah da pynsñiaw u yei sñiawngooh hadooh kattæ kattæ ya utai u sahep uwa da kular wow chimkhia yeini i kaam hajrong i dooh bordiñ ha dong Khliehdupon ha kini ki snem wada dep kiwa da chong hei doom da jan ar snem kattu.
U Blah da kyntu u leh ya kiwa yahkhmat ki chnong waphær waphær wow chimkhia lang ki hawa em i eh i khoo yong u paidbah deiwa pynchlur yaki paidbah yong ka District wa hawa em i yei eh wow lai paan pynche la ha iwon iwon i kaam naki sahep sorkar waphær waphær wym toh u tieñ ki neibynta wow dawa yaka hok wa toh u yoh ki.
Puræ leh: Ar snem hadien wa wan pyndait Meter ym pu yoh bordiñ ki manyung wa dooh ha Ladrymbai
