Ka sorkar Meghalaya lyngba ka chnat Agriculture & Farmers’ Welfare da pyntip ko wa ka sorkar u pteiñ ko wow e 25% ka Subsidy neibynta i sboh cha ki warep ka jylla.
Kini ki sboh u kynthup ki ya u Single Super Phosphate (SSP), Muriate of Potash (MOP) wa u Di-ammonium Phosphate (DAP).
Ini i Subsidy namo wow dai duna dor yei sboh cha ki warep hapoh ka jylla da pyndam ha u 2014 yow pynduna yei chah ktah u bru kamjooh ka rym-aw hawa pynemkaam da ki sboh dawai (Chemical Fertiliser) wa da chna da u bru hi tangwa da chem wa ki warep pteiñ hi ki wow pynemkaam ya kini ki jait sboh yow pynboon yeiwa ye ki u pynmih kam u sapdok, salah, kubi, phulkubi kiwa man ki jhoor wa khlan bha ki bru u rep hapoh ka jylla.
Deiwa pyndam ya ka Subsidy da wanrah ko leh yei dai tooh namo ka Black Market neibynta ki sboh hei dor wa sy’at bha cha ki warep ka jylla.
Kamtæ neiliang ka sorkar da ong ko leh wa kwah ko wow pynku yei ye ki warep u pynmih ki mar rep heiwa ka sorkar ha u Duyatra (Jan) 2023 da e ko 50% ka Subsidy neibynta u Urea wei kam chibynta wow pteiñ yeini yow lait ki warep u thied da ki sboh wa sy’at dor wei yow lait u chah ktah i yoh nong ki da e biang ya kani ka Subsidy wei heijooh i por leh suki-suki yow sdang won u pynemkaam da ki sboh Organic.
Ya kini ki sboh Single Super Phosphate (SSP), Muriate of Potash (MOP), Di-ammonium Phosphate (DAP) wa da dai duna dor 25% ye wow lai li kam ya kani ka Subsidy na ka Meghalaya State Cooperative Marketing & Consumers’ Federation Ltd/Whole Seller da kitu ki dukan kiwa em hok leh wow yoh lang ya ka Transportation Subsidy na ka sorkar Meghalaya.
