Ka seiñ yong ki khynroo wa tip kam ka United Youth Movement 6th Khliehriat Constituency (UYM6KC) hapoh i yahkhmat yong u Lektor Dkhar kam u Chairman da rai ki wow kyrchaan pura ya u Kyrmen Shylla ha ka Election MLA ha u snem 2023.
Ya kani ka yalang ka UYM6KC da pynman ha Community Hall ka Tuber Chohchrieh heiwa u Lektor da batai u chaphang ka UYM6KC wa da pynlang pynlum ki ya ki paidbah khamtam ya ki khon khynroo khyllood yong ka Khliehriat Constituency wow e biang sa chisien ya ka Vote yong ki cha u Kyrmen Shylla ha u snem 2023.
Da kyntu u leh ya ki dkhot wym hoi u chah pynbiej neidaw wa i nang i stat toh iwa emkaam bha katni wei emkaam wow jied leh ya uwa mihkhmat da uwa tip u thoh u puræ wa da uwa tip u klam wei uwa bien u kreh chitom neibynta wow pynyoh yei hok yong ki paidbah.
Da ong u leh wa u Kyrmen Shylla da man u u bru wa leh khian wei uwa emlang chirup chirup wa ki paidbah la ha i kaam sñiawbha næ sñiawsih, kamtæ da iwi i sur ka UYM6KC da rai ko wow kyrchaan pura ya u Kyrmen Shylla.
Ha kani ka sngi da pynchongchit ya ka yalang da i chaad na ki khon khynroo khyllood yong ka chnong Tuber Chohchrieh, Khliehmyntriang, Iongkaluh wei da yoh leh yei klam wa tbian na u Evarist Dkhar na ka chnong Pamrakmai, ka Riiung Sungoh na ka chnong Byrwai waka Mila Siangshai na ka chnong Pamrakmai wei da pynlai bait pynlai ryntih ya ka yalang da u General Secretary ka UYM6KC u Shibunki Kyndait uwa na ka chnong Iongkaluh.
