Ka Jaiñtia National Council (JNC)-Western Zone lyngba ka khubor wa da phah da u Vice President, u Hamehi Bamon, dei mynsien wa sñiawkmen da e khublei Behdeiñkhlam 2024 wasuk wakmen cha ki khon ki hajar ka Ri-loom Jaiñtia khamtam ya ki khon yong ka Seiñraij Jowai kawa da ki bnai ki tayaaw da ya boonkaam ki wow pynkhreh dei mynsien wa chitrhem wow pyndep ya ka niam ka rukom.
Lyngba ka lehniam Behdieñkhlam wa jooh leh man-u-snem, ka seiñ da chaniah skem ko wa u Trekirot uwa booh wa thoo u beh noh u ya ka khlam ka dait, ka kjut ka chitom napoh i tnoom i thyndai, napoh ka chnong ka thaw, ka raij ka muluk wow yoh leh i imsuk imsaaiñ, u roi u phooh ha ki pateiñ pajih liang wanang.
E wa lyngba kani ka Behdieñkhlam u Trekirot u e u ya ka kyrkhu kyrdoh ha ki liang waroh khamtam wow wanrah ya i yatylli hapoh ka Bri U Ynñiawtrep deiwa ri leh yei akor salon wei yei burom kylliang uwi ya uwi.
Ka seiñ kitbok kitrwiang ko wei ngait skem ko leh wow pyndep ya ka lehniam Behdieñkhlam deiwa tip bru, tip Blai. E wa ki khon ka Raij u em ki i yatylli waroh chirup yow yoh i kyrkhu kyrdoh u Trekirot, pynkut ka khubor na u Hamehi Bamon, khublei chihajar ngooh.
Discussion about this post