Ka Jaiñtia Student’s Movement (JSM)- Eastern Region lyngba ka kyrwoh na u President u Wellson R.D. Siangshai da e khublei Behdieñkhlam 2021 wasuk wakmen ya ka Seiñ Raij Tuber waroh kiwa chong wa sah ha kylleiñ ki thaw yong ka Bri u Ynñiawtrep Ynñiawskum wa e wa kani ka lehniam Behdieñkhlam u man ko kawa phooh wa phieñ wa kawa jop.
Ka seiñ da kyrmen ko wa lyngba ini i lehniam wa chisien chi snem daw beh ko chisiendon ya kani ka kjut khlam COVID-19 na kani ka ri.
ka seiñ JSM hi waroh kawi ka kitbok kitrwiang ko cha waroh lang ki khon ki hajar yong ka Seiñ Raij Tuber, wa lyngba ini i lehkmen, lehburom ya kani ka Behdieñkhlam wa daw yoh chiboon i kyrkhu kyrdoh na u Trekirot Kynrad khnang wow yoh yei chait i khiah, i manbha manmiat ha i khih i khan, ka puræ puthi, ka chongsuk chongsaaiñ ha ka imlang sahlang waroh kawi.
Ha i jooh i por da ong wa e wa ini i lehkmen ya ka Behdieñkhlam daw wanrah khamtam ya i yatylli hapyrdi ki jaitbru yong i khnang wa ka ri wa ka jaitbru u nang roi parum pareh ha ki sngi ki por ki wow wan ha waroh ki liang.
