Wot hapyrdi i wan biang ka khlam COVID-19, ka lehniam Behdieñkhlam ka Seiñraij Tuber da sdang ko nadooh 16 hadooh 19 tarik uni u bnai, kawa da ngait wa daw beh ko ya ka khlam wa i sih i roi ha ka imlang ka sahlang.
Ha kam ini i por ka Khasi Students’ Union(KSU) Khliehriat Circle kam ka dak wow chimbynta lang ha kam ini i por, e khublei Behdieñkhlam ko ya waroh ki khon ka Bri u Ynñiaw Trep Ynñiaw Wasa, wei kyrpang ya ki khon ka Seiñraij Tuber da i mynsien wa ka-it wei sñiaw sarong wa ka Seiñraij Tuber daw pynman ko ya ka Behdieñkhlam deiwa bood ryntih ya ki adong COVID-19.
“Kyrmen skem i wa ka Behdieñkhlam daw poi ko cha ka thong wei ngait kamwa da ngait daw ye u beh jngai ya ka khlam cha wa sepsngi,” da ong ka seiñ.
Ka KSU da kitbok kitrwiang ko ya kani ka Behdieñkhlam wow lai bait lai ryntih ha i wow pyndep ya ka niam hanla hap pyndep ya ka deiwa pynduna ya kiwa chimbynta.
Da ngait skem leh wa ka Behdieñkhlam daw man ko kawa jop dei kyrkhu u Blai wow ye u wow kær u daa wei wow beh noh ya kani ka khlam.
Kani toh katkam ka Wyrta na u Streamly N. Suchen, President KSU Khliehriat Circle wa na u Cherity Suja uwa man kam u General Secretary ka seiñ.
