Ka Synjuk Waheh Shnong Ri Jaiñtia (SWRJ) e khublei Christmas wa suk wa kmen wa u snem thymme wa suk ya phi ki khon ka Ri Jaiñtia waroh, “E wa kani ka Christmas u pdiang ya ka dei tip bru tip Blai dei kmen dei rkhai, u kiar na ki kaam kulmar, ki kaam sih, kaam roi, kiaw kiaw kaw kaw, ngait skem lyngba kani ka Christmas u yoh dei chait dei tram, kyrmen u jop ya ka kjut khlam kawa pyntieñ ya phi ya nga”.
Ka Synjuk e ko leh i kyrkhu kyrdoh snem thymme wa suk wa phooh wa phieñ ya phi waroh ki khon yong ka Ri Jaiñtia wa maya, ngait skem i lyngba u snem wa daw wan daw man khih man khan, kiwa lait liang hei lai i wan, kyrmen i leh u yoh i roi i paar, parum pareh, u tnoom u tyndai kam ki dap chynrang dap kynthai, im dei hok dei burom ha sla pyrthai.
Ka SWSRJ kyntu haroh ko ya ki Dorbar Chnong waroh u man ki kam kitae kiwa stat u synchaar ya ka chnong ka thaw ya ki paaid ki raiot waroh salonsar, dei burom tip bru tip Blai, wa kam heini i por wa em ka kjut khlam wow man kiwa pait pyrman wei kiwa ye u bood ya ki aiñ ka chnat i chait i khiah, u ye u yada ya idæ na uni u khñiang wa poor smat na uwi u bru cha u wi. To man kiwa ye u leh kmen nadooh ka Christmas hadooh ka kut snem deiwa bood ryntih ya ki kyndon ki aiñ ka sorkar kam ha kini ki por wei wow man kiwa ya maya ya tylli.
Kyrkhu kyrdoh yow yoh phi dei chait dei khiah ha waroh ki yung ki sem yong i.
Chihajar ngooh ya phi waroh.
Na u President ka Synjuk Waheh Shnong Ri Jaintia u A. Lipon.
