Ka Synjuk Waheh Chnong Ri Jaiñtia dap ko dei kmen dei ka-it mynsien wow e ka khyrkhu kyrdoh ya ki khon ka Ri-loom Jaiñtia waroh ha i wan wei pdiang ya ka Christmas kamjooh wa i pdiang ya u snem thymme 2024.
“Ka Christmas wa suk wa kmen ya phi waroh, e wa kani ka Christmas u man ko kawa ye i u yoh dei chait dei khiah, yow lait na i kdoh i kjut i sam, i jynjar i saja, e wa u pdiang i ya u khon u Blai deiwa maya deiwa yatylli ym hoi u em i mynsien arsap arphong ym hoi u em i bichni i pihuiñ, ym hoi u em i sñiaw mahajon wadooh, e wa u man salonsar i jooh dei mynsien wa sbun wa yinsur, deiwa bood nongmuna wa bha na u khon u Blai u Jisu, kiar na ki kaamsih kaamroi to lehkmen deiwa sñiawthooh.”
“Kamjooh ka snem thymme wa suk wa kmen ya i lang waroh chityllup ka Ri-loom Jaiñtia, to e u pdiang i ya u snem thymme leh deiwa tip yong bru yong Blai wym hoi u em i yachoon ya bichni ka yaleh para bru, to e wa i maya i sñiawthooh yumut u synchaar ko ha ki yung ki sem, ha ka longbru manbru yong i embhah u man khih man khan, u roi u paar i ha ka jait ka kynja, ha ka spah ka phaw, ka hok ka burom, embhah u roi ha i khayi khaba, ki kaam ki jaam, ha i stat i tip wa ha waroh ki liang i im wa bha .”
“E wa uni u snem thymme u ye u pynphooh pynphieñ chooh chooh ya ka jaitbru yong i ha kiwa boon ki liang yow nang ku cha ki kyrdan wa ka naam. E wa u snem 2024 u man u u snem wow ye u kyntu kynrong ya ki manyung mansem yong i waroh cha ka thong i jop hei im yong i.”
Ka Christmas wa suk wa kmen wa snem thymme wa suk wa kmen. Chihajar ngooh.
Ka Wyrta na u A. Lipon, President SWSRJ.
Discussion about this post