Ka Dorbar Chnong Mukhaialong da e ko yei sñiawngooh wa khroo wa i e khublei ya u H. Iakai uwa man kam u Assistant Executive Engineer (Distribution) MeECL kamjooh leh ya u MLA ka 6 Khliehriat Constituency u Kyrmen Shylla neibynta wa chimkhia ki wow kylliang ya u Transformer wa da sih la kamwa chi bnai ha ka chnong.
Ynne ka sngi kiwa kreh ka MeECL da wan pyndait noh ki da u Transformer wa thymme hapoh ka chnong.
Kam wow pynkynmoo heini, u Transformer uwa jooh em ha ka chnong da sih u nadooh ka 17-04-21 wei da pynemkaam ya ka bordiñ na oo cha ki 65 tylli ki manyung heiwa waroh kini ki manyung da su lut ki ya ka bai bordiñ wa sah yong ki.
U Waheh Chnong ka Mukhaialong, u H. Phawa da ong u wa lyngba i kreh chitom u Asst. Executive Engineer (Distribution) wa u MLA ka thaaiñ da yoh biang ya u Transformer wa thymme deiwa kitbok kit rwiang ya ki wow yoh ki yei chait i khiah khnang wow ye ki wow pyndap yei emkaam ha ka imlang sahlang.
