Khliehriat: Kiwa yahkhmat yong ka seiñ Meghalaya People United Front-Sanshnong Circle, katkam ka kyrwoh wada phah lyngba u President ka (MPUF-SC), u Juny Phawa deilang wa u Secretary u Ialamki Sana, da pynsñiaw ki ya i sñiawngooh kawa khroo yaka chnat krehkaam ka MeECL, wa da smat ko wow kylliang ya u Transformer uwa sih wa em haka chnong Mukhaialong Dongwah.
Da phah ki leh ya i kyntien khublei cha ka chnat krehkaam ka MeECL, lyngba kani ka laad pathai khubor u Wyrta wada smat ki wow chimkhia ya ini i kaam kam chibynta wow pynsuk yaki paaid chong dong.
Chooh chooh da pynsñiaw ki yei sñiawkmen, deiwa ong ki leh wa lyngba yong uni u Transformer da pynyoh bordiñ ya waroh kitai kiwa chongdong, deiwa yoh thymme ya utai u Transformer da pynsuk ko leh ya ki paaid ka dong, da pynsuk ko leh khatam yaki khoon khynroo yong katai ka dong, neibhah kiwa boon hi kiwa em Online Class haki kyrdan waphær waphær neidaw yong ka khlam COVID-19, kamjooh leh da pynsuk yaka imlang sahlang hi waroh kawi.
