ka Dorbar Chnong Mukhla Nongrim West Jaiñtia Hills da e khublei kyrpang ko ya ka Ramakrishna Mission Sohra kawa da smat wow wan e yarap da ki marbaam ya ki manyung wa dooh wa duk, dei mynsien wa em i kitkhlieh ya kiwa dooh wa kyrdooh hapoh ka chnong.
Neiliang u Standby Me Sari, Executive Member ka chnong da pyntip u wa hadien wa chim u ya ka rai wow kyrpaad yarap na ka Mission lyngba u Manbha Lyngdoh uwa man uwa kreh mon sñiawbha kani ka Mission uwa pait ya ka Jaiñtia Hills, kamtæ da e khublei ya u Manbha Lyngdoh yei mynsien wa sbun yong oo wow pynsñiaw ha u Secretary ka Ramakrishna Mission uwa man leh kam u Maharaj heiwa da wan ha ka 11 tarik uni u bnai wow e yarap cha ki manyung wa dooh wa duk hapoh ka chnong da u khoo wa u dai, iwa da man i myntoi ya ki manyung wa dooh wa duk yow yoh ki yei kyrchaan heiliang ka baam ka dih khamtam ha kam ini i por wa em ka Lockdown.
Kamtæ sa chisien da i mynsien wa kmen wa burom ya u Manbha Lyndgoh wa ya u Maharaj ka Mission uwa da krehchitom neibynta wow yarap ya kiwa dooh wa duk, kiwa kup chiliang kiwa sem chilliang, da kitbok kitrwiang ya ki wei kamjooh ya ka Mission leh wow nang kreh chitom chooh chooh ya ki kaam wa bha yong ki.
