E khublei ka Seiñ Kur Dkhar ya ka SDO wa ya ka KSU kiwa pyndooh ya ka EPIC u baar jylla

Jowai: Ka Seiñ Kur Dkhar Wapung Circle East Jaiñtia Hills District da e khublei kyrpang ko ya ka KSU War Jaiñtia Circle wa ka Sub-Divisional Officer (Civil), Amlarem Sub Division ka J.U. Kharpuri kiwa da chimkhia wow khut hajir ya uwi u baar jylla uwa pyrtuid u Jagir uwa da pynkylla kur pyn da oo ya oo hi deiwa chim yaka jait yong ka kur Dkhar, uwa da yoh leh ya ka EPIC kwa uwa thap Vote wa chong wa sah ha ka chnong Mupyut West Jaiñtia.

Ka kur Dkhar ka da pynrem joor ko ya kiwa e laad ya kam kini ki baar jylla kiwa chim ya ka kur ka jait wa kyntang yong ki kawa da yoh na ki longchwa manchwa.

Da e khublei ki yei chimkhia ka KSU wow thooh wei wow booddien ya uni u baar jylla hadooh wow lai ujor cha ka SDO Amlarem wei da pyndooh syndon ya ka EPIC yong oo.

“I Maham joor i ya kiwon kiwon ki bru kiwa chimkabu deiwa pynemkaam yaka jait yong ka kur yong I,” da ong u Shaniah Shkem Dkhar President Seiñ Kur Dkhar Wapung Circle, deiwa pynrap wa ym e laad i leh ya kam kini ki jaitbru kiwa chimkabu du wow yoh myntoi ki samen.