Ka STIEH da e khublei ko ya ka Sadar PS, Shillong khamtam ya ka Lumshnong PS wa ka yung krehkaam u Superintendent of Police ka East Jaiñtia Hills, Khliehriat wa da bien ki wow chimkhia yow booh yei takit ya ka Megha Purkayastha hadien wa e FIR ka seiñ pyrchah ya kani ka bru ha ka 16 tarik uni u bnai hajrong i klam pynyaphær jaitbru wei pyrchah ya ki jaitbru ri-loom ka thaaiñ Northeast khamtam ya kiwa na Meghalaya ha ka Instagram yong ka.
Ka seiñ da ong ko wa i pynbaad kani ka bru pyrchah ya ki bru ka Meghalaya toh iwa daw booh hei maa ya kiwa em cha baar jylla wow lai kreh wei wow lai puræ puthi.
Chooh chooh da ong wa ki bor ka aiñ toh u pynman ki kam ka nongmuna ya kani ka bru kawa da klam khlem da em i kitkhlieh kawa pynyaphær jaitbru hajrong ka niam, ki thaw sah, ki thaw kha deiwa kam ya kiwa boon jait ki wym em.
Da ong leh toh u chimkhia ya ini heiwa ynnin u snem ki pulit ka Nagaland da kem ki ya ka Hema Choudhary na yung ko na Mumbai hadien wa klam pyrchah ko ya ki bru ka Nagaland.
Ha uni u snem won ki pulit ka Arunachal Pradesh da lai ki cha Punjab yow kem ya uwa klam pyrchah ya u MLA ka Arunachal Pradesh, u Ninong Ering.
Ka STIEH da yooluti ko leh wa ki pulit daw chimkhia ki leh hawa yatoh wa u Vicky Dey.
