E khublei ka UDP-MC ya u Pius Marwein hadien wa jop u ya ka Election na Ranikor

Jowai: Katkam ka khubor wa da phah da u President yong ka seiñ ka UDP Mowkaiaw Circle u Eleazer C Dkhar da pynsñiaw ko yei kmen wa khroo wa da jop em burom yong u Pius Marwein kam u kyrtong yong ka seiñ UDP na Ranikor.

Da ong wa hadien 20 snem da synchaar da ka seiñ Congress wei katni ki paidbah ha katai ka thaaiñ da sdang ki wow kyruiñ cha ka seiñ ri-loom, kamtæ kiwa mihkhmat yong ka UDP Mowkaiaw Circle da kitbok kitrwiang ki ya u Pius Marwein kam u MLA wa thymme yong ka Ranikor naka seiñ UDP kawa kreh neibynta ka imlang ka sahlang.

“I jop yong u Pius pynyoo ko wa ki paidbah ki kwah sakhiat ki yei kylla hapoh Ranikor hadien ki e laad ki 20 snem ya u MLA warim u MM Danggo wow synchaar, wei ym ye u len wa i jop yong u Pius man ko kawa e mynsien chooh chooh ya i kiwa kitkaam wow yohbor wow kreh bha chooh chooh hapoh ka Party khamtam wow pynkhreh ya ka Election MDC ha u snem 2019.” ong u President ka UDP Mowkaiaw Circle.