Jowai: Ka West Jaiñtia Association of Kickboxing (WJAK) ha ka 12 tarik uni u bnai, da pynman ko ya ka yalang ha yung krehkaam ka seiñ ha Khliehiongriang, Jowai kam ka dak wow e khublei kyrpang ya ki 5 ngut kiwa chimbynta ha ka lympung yalehke (Tournament) wa pynman da ka WAKO India Senior National Kickboxing Championship – 2018 kawa man ha ka 2 hadooh 5 tarik uni u bnai ha Kshudiram Anushilan Kendia, Kolkata West Bengal kawa em hapoh ka lama yong ka WAKO International Federation (IF).
Na pyrdi ki 5 ngut kiwa chimbynta ka West Jaiñtia da rah ki 4 tylli ki takma heiwa 2 tylli toh ki takma ksiar, wei 2 tylli won ki ki takma tama. Kini kiwa yoh takma kynthup ki ya u Pynshrainmiki Rabon (Low Kick-67 kg) (Gold), u Hameshaniah Suiam (Point Fighting/Kick Light -57 kg) (Gold/Bronze), u Pynbait wan- I Kanai (K1 -51 kg) (Bronze) katwa u Bantei Sungoh wa u Ioonis Mynsong da chah pynrem noh ki ha ka Quarter Final.
Ka Lambha Daka Patlong (Referee) da chah jied ko kam kawi na pyrdi ki 30 ngut ki Referee (Tatami Sport) ha ka thup yong ki (5 Top Best Referee).
Neiliang u President ka seiñ, u Lummy Plain da e khublei u ya kiwa chim bynta chirup wa i khyrkhu kyrdoh kamjooh leh ya ki lok kiwa da kyrchaan lyngba ka i yarap yong ki wa kynthup ya u Phasmon Dkhar (MDC ka Musniang-Rngad), K.M Lytan (MDC ka Shangpung), L.S Shylla (MDC ka Ummulong-Moodymmai), Dameki Paswet na Panaliar Jowai, Treki Mukhim wa kiwi kiwi.
Heijooh i por ka WJAK da e khublei ko leh ya u Hameshaniah Suiam uwa da jop hadooh 5 sien kam u National Gold Medalist wei da yoh u yei kyrdan wa 39 yong ka pyrthai namo ka World Ranking ha ka yalehke Point Fighting wei da yoh u leh ya ka naam 2nd Degree Black Belt.
Neiliang u Hameshahniah da pynsñiaw u yei sñiawngooh wa khroo ya u Phasmon Dkhar uwa da kular wow e yarap ya oo neibynta wow lai chim bynta u ha ka World Championship ka wow man ha Antalya, Turkey nadooh ka 23 Khonchonglad (November) 1 Kmaichonglad (December) 2019.
Ka seiñ da dap ko leh dei mynsien wa kmen heiwa ki khynnah wa yalehke Kickboxing neibhah ya ka yalehke Kickboxing kawa hapoh ka Lama yong ka WAKO (IF) kawa da yoh yei tipmit (Recognition) na ka International Olympic Committee (IOC).
Discussion about this post