Ki soo tylli ki seiñ wa kynthup ya ka All Hynniewtrep People United Front (AHPUF), ka Jaiñtia Women Awakening Movement (JWAM), ka All Meghalaya People Organization (AMPO), ka Jaiñtia People Organization (JPO), da e khublei ki ya ki pulit ka Crime Branch Shillong wa ki pulit ka East Jaiñtia Hills wa da kreh chitom ki wow kem ya u Heibormi Dkhar uwa na Pamra Kmai uwa da typyap ya ka Ebamon Siangshai.
Ki soo seiñ da kyntu ki leh ya ki bor ka aiñ wow pynchitom ya uni u bru katkam ki kyndon ka aiñ khlem ñiaw chiliang.
“Ham e wa ka spah u thied ko ya i hok wa ya ka aiñ,” da ong ki soo seiñ deiwa pynrap, e wa uwa leh ya ini i kaam u chah pynchitom u katkam i kaam u.
Ki soo seiñ da dawa ki leh ya ki pulit ka West wa East Jaiñtia wow kreh ki wow yoh kem ya waroh kiwa emkti ha ini i kaam ym du ya kiwa tynyap ya ka Ebamon Siangshai tangwa ya kiwa tynyap leh ya ka Mantip Langstang.
Ki soo seiñ da wyrai ki leh ya i khlaad syndet ki san ngut na Raliang ha chnong Moowamon, Mihmyntdu nei yap-op hapoh ka thlu-um ha ka 29 tarik u bnai wa dadep deiwa phah leh ka khubor pyntngen cha kiwa hayung yong ki.
Da kyntu leh ya kiwi kiwa kreh ya ini i kaam wow man ki kiwa syndong neini chaphrang wei da kitbok leh ya ki ar ngut kiwa em hapyrdi i chah sumaar wow chait noh ki.
