Jowai : Ka seiñ Jaiñtia Students’ Union (JSU) ka wi na ki seiñ kawa kreh mon sñiawbha ya ki khynnah skur kamjooh ki khynroo khyllood kiwa em hapyrdi i puræ puthi kawa man tre hapoh ka Ri-loom Jaiñtia ha ka khubor wa pyllait ynne ka sngi lyngba u Education Secretary yong ka u D. Syngkon da e khublei kyrpang ko ya waroh kiwa sikai skur hapoh ka jylla ha ka sngi kynmoo burom ha man u snem ha ka 5 tarik.
Ka JSU da ong ko wa i sikai toh i kaam wa khia wei saja bha khamtam ya kitu kiwa sikai ha ki klass khian tangwa man ko leh ka kaam kawa emburom dooh hadooh wow ong wa ye u man iwa kyntang.
Ha iwi tawan i liang, ka JSU sñiaw khia ko u yoo wa kiwa sikai yong i haap ki u mih cha sarok du neidaw wa dawa ki ya i hok i yong ki. Kani pynyoo ko wa ki heh sorkar kamjooh kiwa mihkhmat yong i ym em u kheiñ kor ki ya kiwa sikai kiwa da kreh chitom hei wow pynpsiah yei tip yei stat ha ka jabieñ yong uwi pa uwi namo kawi pa kawi.
Kamtæ haprdi ini kiyi kiyi waroh, ka JSU pynsñiaw ko wow e khublei kyrpang ya kiwa sikai skur yong i waroh ha ka sngi wa khroo ka yong ki, e wa u Blai kynrad u em lang u chirup wa ki waroh kamwa kynmoo burom ki ya kani ka sngi wa khroo yong ki yow ye chooh chooh ki leh u e yei stad i yip wa paka hapoh ka imlang sahlang yong i waroh kawi.
Discussion about this post