Jowai: Hadien 7 tylli ki Election heiwa 5 sansien da jop wei arsien da rem u kam u MLA, u Dr. R.C. Laloo ynne ka sngi da pynman u ya ka yalang ha pchem yung oo wow pysñiaw yei sñiawngooh yong oo cha waroh kiwa kyrchaan ya oo nadooh u snem 1983 wa yieñ yaleh Election nyngkong dooh u.
Da e khublei u ya kiwa kyrchaan ya oo deiwa ong wa ini ymtoh i wa kut ka luti ya oo wa ki, wei man ko i sdang ka luti wa dang thymme. Da ong u leh wa ym chongiah hi wot u na waroh ki kaam saiñ hima sima wei ha kani ka Election MLA wow wan leh daw emkti hi u ha ka.
Da pynbna u leh ya u Andrew Shullai kam u kyrtong MLA wow yieñ hei thaw yong oo wei da paan u yei kyrchaan ki paidbah neibhah da tikna bait u wow jop u ha kani ka kynti neidaw wa boon ki kyrtong wow yakhun Election wei heipor yong oo da ong u wa dei marsamen i jop man i iwa eh bha.
Neiliang kiwa hayung hasem u Dr. Laloo da klam da kawi na ki khon kynthai u kawa da e ya ki kyntien khublei ya kiwa kyrchaan ya u pa ko nadooh kiwa chna sur, ki dong ki chnat, ki chnong ki thaw kiwa da chah wow pynman ya ki yalang yalap Election.
Ha kani ka yalang da elaad ya kiwon kiwon wow e yei klam yong ki heiwa kiwa mihkhmat kam na Chutwakhu, Mynthong, Tpep-Pale, ki bru samen na ki chnong kam na Sohmynting, Phlongiñkhaw, na Jowai wa kiwi kiwi da pynsñiaw ki yei sñiawngooh ya ki kaam wa boon wa da yarap u Dr. Laloo ha ki 25 snem wa da man u kam u MLA.
Da pynsñiaw ki leh yei kyrchaan ki ya u Andrew Shullai kam u kyrtong MLA na Jowai Constituency.
Neiliang u Andrew da ong u wa u pteiñ hi u man kam u CEM ka JHADC hanlada u yaleh MLA u wei u bood dien u ya ki nongmuna wa bha wa da yah u Dr. Laloo wei sñiawngooh u wa yoh u ya u Dr. Laloo kam uwa yahluti ya oo.
Discussion about this post