Ynnin ka sngi u President ka ri America, u Donald Trump da ekhublei u ya u montri rangbahdooh ka ri, u Narendra Modi hadien wa da pynyinsur ka sorkar wow chalan ya ki dawai Hydroxychloroquine cha ka America wow yakhun pyrchah ya ka khlam u COVID-19.
Ka ri India nyngkong da chim ko ya ka rai wow pyndam u chalan ya kini ki dawai neibhah wa emkaam chwa wow pynbiang ya ki hapoh ka ri wow sumaar ya kiwa yoh ya uni u khñiang.
Ka ri America toh ka ri wa da chah ktah joor bha ha uni u khñiang heiwa kiwa da yap da em ki 14,000 ngut na uni u khñiang katwa kiwa da yoh ya u COVID-19 da em ki palat 420,000 ngut.
Ha kini ki sngi wa dadep neiliang u Trump da maham u ya ka India lada ym pynlait ko ya kini ki dawai neibynta ka ri America wei yeini neiliang ka chnat baar ri namo ka Ministry of External Affairs ka India da beiñ joor bha ko.
Hadien won ka India da rai ko wow pynyinsur ya ki kyndon wow pynlait ya kini ki dawai wei hajrong ini neiliang u Trump da ekhublei u ya u Modi wa ki paidbah ka ri India.
U Trump da ong u wa kam ha ini ki por emkaam u yakrehlang ki lok wei da ekhublei u hajrong ka rai wow pynlait ya kini ki dawai wei ini waroh ymye u mylliñ ya ki.
Discussion about this post