U Chairman ka Hynniewtrep Border Disputed Redressal Forum (HBDRF), u Chandame Sungoh hadien wa yoo u ya ka khubor kawa da mih ha u KAT NEWS CHANNEL uwa man ka laad pathai khubor yong ki jaitbru Karbi haka 16 tarik uni u bnai iwa yatoh hajrong ki rai wa da mih naka yalang yong ki ar jaitbru hapyrdi ki Pnar wa Karbi kawa da pynman ha chnong Khanduli haka 16 tarik uni u bnai, u Chandame da ong u wa itu i klam cha kiwa thoh khubor Karbi da u Augustine Hansen uwa mihkhmat naka jaitbru Karbi boon toh dei thok dei jlær u neibhah wym em yahaap wa ki rai wa da chim wei mynjur da waroh arliang ha ka yalang.
Ka rai kawa jlær heh u Augustine kynthup ya ka Entry Tax Gate kawa da rai lang wow ieh hei stat wa i rai ka Regional Committee yong ki ar jylla, tangwa uni u Augustine klam u dei khangtleiñ ha ki laad pathai khubor Karbi deiwa ong wa ki Pnar da pdiang ki yei dawa yong ki paaid Karbi wow booh biang ya ka Entry Tax Gate wei la jia wa ki Karbi u wan booh biang ki ya kani ka khyrdop haki bnai ki snem wow wan leh ki Pnar wymtoh de u khanglad ki.
Heiyatoh wa i mang ka sorkar Assam wow chna ya u surok PWD/NEC uwa nadooh Baithalangso, ki Karbi da ong ki wow chna hadooh Khanduli wow man u pood u ang ka Karbi Anglong, Assam, hajrong ini ki Khanduli da ong ki kammon u e laad hadooh Khanduli hawa nachwa da chna du hadooh Zero Point næ ka Yaaw Thymme ki Karbi wa katni.
Wei ya kani leh da rai wow e kti hei rai ki arliang sorkar wa hadooh heiwon u chna ka sorkar Assam wei hadooh heiwon u chna ka sorkar Meghalaya, kamtæ kyrpaad ki ya ki paidbah ka chnong Khanduli kiwa em thaw marjan wa ki chnong Karbi kam cha Rtiang Sanphaw, Myni, Lakaroi, Tahpat wa lada em thaw ki cha kini ki chnong leh wym toh u lai Register chadooh ha Karbi Anglong Autonomous Council hanla haap mynkna ha chnong Karbi leh neibhah katkam ka Notification 13 April 1951 kini ki chnong dang haap pura ki hapoh ka jylla Meghalaya.
Ong haroh u wym toh u tieñ yei ong ki Karbi wa hap rah da ki Original Pata yow pynyoo cha ki waheh chnong hawa lai rep. Da e yumut u iwa biang tam toh u rah cha ka sorkar khnang yow yaklam ki para sorkar.
Neitæ lada em hali won kam cha Rongpangbong, Umpawiang, Stonglapar, Nongjrong, Umpasoo ter ter kini ki thaw leh haap ki hapoh ka Block-I wei dang em ko hapyrdi i yaklam yow uiñ biang ko chapoh Meghalaya.
“Ka rai wa klam u kamwa man hi neiwa ya mynjur lang toh i dawa ki Karbi ya ki jaitbru Pnar wa em thaw rep cha ka thaaiñ Karbi wow lai pynbiang ki ya ki kot pata ha Karbi Anglong Autonomous Council wei kamjooh leh u su dan cha ka KAAC”, da ong u Chandame.
Puræ leh: Nadooh ka 21 tarik u sdang biang ki Pnar u hiar rep cha Karbi
Discussion about this post