Ka Dorbar Chnong Lumputhoi kawa em hapoh ka Elaka Rymbai, EJH chirup wa kiwa kitkaam ka Village Water and Sanitation Committee (VWSC) hapoh i yahkhmat u General Secretary Chnong uwa man leh u Secretary (VWSC), u S. Lyngdoh ha ka 3 tarik uni u bnai da pynman ki ya ka yalang pynsñiawthooh paidbah hajrong ka phang “Kammon u pynwiar næ pyndooh jait ya ki Plastic” khnang yow lait nei jakhlia ki soodong sookun, ka bei rymaw khamtam ya ka chnong ka thaw hi waroh kawi yow man ko kawa khooid wa jngiar.
Hadien kani ka yalang da saam leh ya ki khusnaam cha kiwa chong chnong kiwa yoh nongkong, wa-ar, wa-le ha ka yakob pynlang Plastic kawa da phah pynlang ya ki nadooh u snem 2020, iwa mut chisnem lynter hap ki wow pynlang deiwa lai jied lai tam na waroh soodong ka chnong.
Neliang u Waheh Chnong da pynsñiaw u yei sñiawngooh wa khroo cha waroh kiwa chong chnong wa man sakhiat ki kiwa smat wow yakrehlang chirup wa ka Dorbar Chnong.
Da e khublei wei da kitbok kitrwiang u ya ki waroh kamjooh da kyntu kynpham leh ya ki wow man ki kiwa smat u yakrehlang khnang yow ye u leh khooid leh jngiar ya ka chnong ka thaw.
Ka thong wa hakhmat dooh yong kani ka ‘Yakob Pynlang Plastic’ toh yow wanrah yei khooid i jngiar hapoh ka chnong ka thaw kam chibynta wow khanglaad nei pynjakhlia ya ka bei rymaw kawa i kam ki bru da chong da sah i hajrong i snieh i swar yong ka.
Ha ini lai luti wa nongkong ka Dorbar Chnong Lumputhoi da mana ko leh ya waroh kiwa chong chnong, ki kari kamai, ki bru wa wan na baar chnong wym chah wow noh roi ya ki Plastic hapoh ki thaw ka chnong. Lada chem ya kiwa leh pyrchah, ka Dorbar Chnong daw pynchitom ko ya ki katkam ki kyndon aiñ ka chnong.
Ka Dorbar Chnong da kyrpaad ko ya waroh ki tre chnong, kiwa na baar chnong wa wan emkaam chapoh chnong wa toh u wan ki da ka akor ka burom deiwa bood katkam ki kyndon ka chnong kamjooh wow sñiawbha ki wow yakrehlang khnang yow ye u wanrah yei khooid yei jngiar. Da kyrpaad leh ya ki bor wa toh u pait ka sorkar wow pynyoh ki laad yarap khnang wa ini i thmu ka Dorbar Chnong yow man ko iawa jop, pynkut ka khubor na u General Secretary, Lumputhoi, u S. Lyndoh.
