Ka Sein Raij Shnong, Tuberkmai Shnong ynne ka 7 tarik haka yung Duwan Raij Tuber, ha i yalam luti u Secretary u Tellme True Phawa wa u Chairman u Ksohlang Phawa, da pynman ya ka saam khusnaam yaki khynnah wa leh bha ha ki Exam ha u snem 2020, neibynta ki khon yong ka chnong, du ya kitu kiwa yoh 80% chaneiñ.
Ha kani ka e khusnaam da yoh ka Mantresah Lyngdoh kawa da yoh 92.16% haka Class XII (Science Stream) deiwa yoh Distinction ha waroh ki Subject yong ka CBSE. U Ribait Phawa uwa da yoh 90.50% haka SSLC Examination 2020 wei man u leh uwa da wan haka thup Top 20 deiwa yoh heiwa 12 wa 5 tylli ki Distinction wei da yoh u leh yaka Highest Marks haka Mathematic haka Exam wa pynman daka MBOSE.
Chooh chooh ha kani hi ka sngi ka Khynroo Khyllood Committee, Sein Raij Shnong, Tuberkmai da pynman ko leh yaka yasyllok Niamtre-4 kawa jooh leh man-u-snem kawa da yahkhmat da u Starmon Lyngdoh wa u Secretary u Reveller Phawa.
Ya ini waroh da wan wow sakhi da u President ka Raij Tuber u Bewill Shylla, u Rikut Parein, u Tanbok Dkhar, u Jiedlang Sana, General Secretary Tuberkmai Shnong, u Micky Lyngdoh wa ki dkhot yong ka chnong waroh kawi wa kamjooh ki paaid chong chnong.
Ha kani ka yalang da yoh leh ya ki kyntien snien kyntien kroo na kini ki waheh wei kamjooh leh na kawi ka manbei wada pynkhreh da ka Seiñ Manbei Tuberkmai Shnong ka Beautiful Sana.
Neiliang ka Sein Raij Shnong da kitbok kit rwiang ko ya ki khynnah waroh kiwa daw thoh yaka Exam SSLC, HSSLC ha uni u snem 2021 wa han lada u snem wa da lai man u uwa sih, e wa u Blai u emlang u wa waroh ki khynnah wa dang yaleh ya ka Board Exam wow nang ku ki chakhmat.
