Ka Khasi Students’ Union-Nongspung Unit ynnin ka 20 tarik da e khusnam ko yaka Rimaphi Nongsiej kawa 16 snem i rta kawa naka chnong Nongspung East Khasi Hill kawa da pynlait im ya uwi u khynnah khian wa dang 2 snem tam na i ngam u haka wah Umbah Langrei kawa em hapoh ka chnong Nongspung hi.
Ini da jia i haka 9 tarik u Naiynru uni u snem heiwa ka Rimaphi da ye ko wow sai ya uni u khynnah cha lait napoh kani ka wah yow lait u na i maa neiwa chah rah haka um. Kamtæ yow pynsah naam ya i kaam wa khroo yong kani ka bru chlur yong ka chnong Nongspung, ka KSU da yoh ko wow e yei sah naam deilang waka song poisa lyngba U Publicity Secretary ka KSU Central Executive Council u Pynshai Rani deiwa sakhi lang yong waroh kiwa kitkaam ka KSU Nongspung Unit wa kiwa yahkhmat ka KSU Nongspung Circle.
U Pynshai Rani da pynsñiaw u wa ka KSU ka sñiawsarong ko chiboon ya kam ini i mylliñ ya idæ yow yarap ya kiwi nei maa wei da yooluti u wa ini i mynsien chlur daw psiah i ha uwi pa uwi wa chong chnong khnang wow man ko i kyrmen ya kiwa tyngkhooh ya kam ini i jia.
Ka KSU Nongspung Unit da kit bok kit wriang ko yaka Rimaphi wow em ko ya i doh i pran wa chait wa khiah wa kiwi leh wow bood ki ya i nongmuna yong ka.
