U Montri Rangbah ka jylla, u Conrad K Sangma da sdang u ya ki luti lai yong ka jylla ha kini ki san snem wow wan yow pynpoi yaka yoh ka kot cha ka 10 Billion Dollar lyngba ka Invest Meghalaya Authority yong ka Meghalaya Industrial and Investment Promotion Policy 2024 kawa dang dep mynjur ka sorkar ini wa dep yow khriñ ya kiwa seiñ kaam kiwa na baar wei kamjooh kiwa na kani ka jylla.
Kam chibynta ini, ka sorkar da yasoi soskular ko waka Company Pepsi yow pynlut ko palat Rs. 180 klur ha Mendipathar ha i thaw wa heh 25 Acre wei da yasoi soskular leh waka North East United Football Club yow booh yaka skur sikai yalehbol ha Mawkhanu wa kiwi kiwi.
Katkam wa ong u Conrad, 90% ki kaam wa man kam ki Unskilled Job u lai bait ki cha ki tre chnong.
Yow poi cha ka thong 10 Billion Dollar, u Conrad da ong u wa yeini daw ye u poi deiwa wan pynlut poisa ki Company deiwa e buskit ka sorkar cha kitu kiwa wan seiñ kreh hapoh ka jylla.
Yow ye u leh yeini, ka sorkar jylla daw emkaam ko wow theh kamwa Rs. 700 klur cha ki Company ha kini ki chiphaw snem wow wan ha ki kaam pynmih karkhana.
Ini i e buskit u man ko kam ka bai seiñ, i maap yaka sut, i pynlait nei su SGST wa kiwi ki luti yow pynjem wei wow pynsuk ya kiwa seiñ kaam seiñ jaam.
Ki jait kaam wa da pynchlur ya ki karkhana u leh ki toh kam i pynmih bordiñ, ki kaam Information Technology, ki kaam uiñke suwari, ki kaam rep, ki kaam chna baam, ki kaam yalehke, ka riti dustur wa kiwi kiwi de.
U Montri Rangbah da ong wa daw yooluti u poi cha kani ka thong ha ki san snem wow wan, wei da yasoi yaka MoU namo ka soskular yakdoh ktien wa ki Company ha ki chnat waphær waphær. Wei da khana u leh wa da mynjur wow pynlut kamwa Rs. 2957 klur ha ki 9 tylli ki MoU wa da dep yasoi hajrong ki kaam Tourism, Food Processing, IT, Beverages wei yeini da ye u leh deiwa pynkrehkaam da ka Industrial Policy wa thymme wei daw yasoi chooh chooh ha kini ki sngi wa kiwi kiwi de.
Khnang wow pynsuk ya kiwa wan seiñ kreh hapoh ka jylla, daw ya pynbait leh wa ki Autonomous District Council khnang wym mih iyi iyi i eh wa i thut.
Kamtæ ynne ha ka yalang wa da pynman ha Mendipathar, u Montri Rangbah da e kti u yei thaw deilang wa ki kot ki sla cha ka Varun Beverages yow booh yaka karkhana namo ka Industrial Unit ha Mendipathar, North Garo Hills.
Neiliang u Conrad da e khublei u ya u Chairman ka Varun Beverages, u Ravi Jaipuria yeiwa bien ki wow wan wai ya kani ka karkhana ha Mendipathar wei deiwa wan kani daw pynkylla dur ko ya kiwa chong chnong kani ka thaaiñ wei da e khublei u leh yaka MIDC wa smat ko wow pyndep yei kaam yow e kti yei thaw.
Da pyntip leh wa hapoh kani ka karkhana kawa man kam ka Bottling Unit daw song ya ki Soft Drinks kam i Pepsi, Mirinda wa kiwi de.
Kamwa man kattæ ki Soft Drinks wa dih ki bru hapoh ka tylli toh kiwa da song ha Assam næ West Bengal wei da yooluti leh wa daw ye u song ya kiwi ki jait umsoh wa pynmih na ki soh wa thung hapoh ka jylla kam u sartooiñ.
U Conrad da pyntip u leh wa kani ka Company daw pynlut ko Rs. 185 klur ha kani ka thaw yow chna yaka karkhana kawa daw pyndep hapoh 12 bnai wei kani ka karkhana daw phah ko leh ya kini ki mar yong ka cha kiwi leh ki jylla.
Discussion about this post