Ka Seiñ Khynroo Khyllood Katholik Parish Ummulong ha ka 7 tarik da pynman ko ya ka yalang wa tbian heiwa da e kti u Wailadmiki Shylla, Montri sorkar ya ki tiar chet cha ka Seiñ Khynroo Khyllood Katholik Parish Ummulong ha yung Parish.
U Wailadmiki Shylla hawa e yei klam da yaroh u ya ki khon khynroo kiwa da kreh chitom neibynta ka imlang sahlang deiwa kyntu leh wow kiar nei drugs wa kiwi ki jait dih pynmuaid kiwa pynsih yei dur ka yung ka sem deilang ka chnong ka thaw kamjooh ka imlang sahlang waroh kawi.
Kini ki tiar chet wa da e kit kynthup ki ya ki kchu, ki Syntex, ki Filter wa kiwi kiwi ki tiar.
Neiliang u Deiwipaia Shylla, General Secretary, da e khublei kyrpang u ya u Wailadmiki Shylla neibynta i sbun wei kyllooid mynsien yong oo wow e sñiawbha da kini ki tiar chet cha ki khynroo ka Parish.
Ha kani ka yalang da wan sakhi da ki khynroo ki 17 tylli ki Balang Chnong kiwa haap hapoh ka Ummulong Parish deilang wa ki kattu katni ki rangbah wa kynthup ya u Rev. Fr. Polycarpus Shylla, Parish Priest ka Ummulong Parish.
Discussion about this post