Ynne ka sngi, ka UDP-4 Mowkaiaw da jied ko ya kiwa kitkaam yong ki san tylli ki chnong kiwa napoh ka Elaka Mynso kiwa kynthup ya ka Samatan, Thadialong, Lummuriap, Thadbamon waka Sookhlieh.
Ya ka yalang da pynman ha Samatan heiwa da wan sakhi da u MLA ka thaaiñ, u Nujorki Sungoh, u MDC ka Mowkaiaw, u Winning G Sungoh, u President ka UDP Mowkaiaw, u EC Dkhar wa kiwi kiwi.
Hapoh kini ki san chnong em 1,412 Vote katkam wa man katni wei ha ka yalang da wan ki paidbah khrui.
Kiwa klam ha kani ka sngi nadooh ki waheh chnong wa kiwi kiwi da yaroh ki ya u Nujorki Sungoh uwa da kreh chitom, uwa wanrah ya ki kaam pynroi ha ki san chnong khamtam ki sarok wei da kitbok ki wow kyrchaan ya oo sa ha kani ka kynti khnang wow ye chooh u wow kreh ya ki kaam.
Da ong ki leh wa u Nujorki ymtoh u bru wa joor du i klam tangwa uwa leh da ki kaam kamtæ da kyntu ki wow kyrchaan ya oo yow yoo ki ya ki kaam ymtoh wow chah pynbiej ha kiwi tawon.
U Winning G Sungoh da ong u wa hanla man ko ka sien wa nyngkong ya u Nujorki wow man kam u MLA tangwa da krehchitom u ya ki kaam yong oo heiwa da klam u leh yeiwa emkaam ka thaaiñ hapoh ka Yung Dorbar Chna Aiñ ka jylla.
Da ong u leh wa da synjor ka sorkar toh du da ki heh spah kiwa pynbiej paidbah khnang wow myntoi ki samen.
Chooh chooh da ong u wa i yah ka NPP ya ka sorkar da ksih ko ya ki paidbah ka jylla wei katni da yoh ka NPP wow chna yung krehkaam cha kiwi tawon ki jylla katwa kamtæ emkaam wow man ki bru kiwa husiar wei kiwa syndong chwa wow jied ya kiwa mihkhmat.
U Winning da kyntu joor u ya ki paidbah wow kyrchaan biang ya u Nujorki ha kani ka kynti khnang wow ye sakhiat u wanrah ya ki kaam pynroi khamtam wa da kreh u la san snem kattu da rap chem luti u ha ki kaam synchaar khadar.
U EC Dkhar hawa e yei klam da ong u wa kam ki khon ka Elaka Mynso emkaam yei yatylli wei ymtoh u chah pynbiej ha ki bru kiwa na baar Constituency kam na Nartiang.
Da ong u wa u kyrtong ka NPP u Habahun Dkhar toh uwa hayung kam u ma u wei ym em kyrchaan u ya oo wei da yieñ skem u wa u Nujor uwa da chakri hok u ya ki paidbah ka Constituency waroh kawi.
U Nujorki hawa e yei klam da sñiawkmen u wow yoo yei wan ki paidbah ki san chnong cha kani ka yalang wow pynlait yei por wa kordor iwa pynyoo yei maya ki ya oo.
Da ong u wa i lai luti kam uwa mihkhmat da yaleh u katwa joh i bor wow wanrah yei myntoi waphær waphær hapoh ka Constituency wei hanla boon ki kaam wa sahteiñ tangwa hun u wow yoo ya ki luti syngkieñ, ka um dih wa kiwi kiwi.
Chooh chooh da khana u yei lai luti yong oo deiwa pdiang u ya ki chnong ki wym em yoh Vote u leh tangwa da kreh bait u ya ki neibhah wa ki leh haap ki hapoh i pait yong oo.
Da paan maap u leh yeiwa ymye u wow kreh ya ki kattu katni ki bynta wa angnood ki paidbah wei kyrmen u wow wanrah chooh ya ki kaam pynroi ha ki chnong ha ki san snem wow wan lada chah jied biang u kam u MLA.
U Nujorki da ong u wa ha ka thaaiñ Saphai Iooksi hanla yoh u du kamwa 200 Vote tangwa da wanrah u chiboon ki kaam pynroi nadooh ki sarok, ki yung skur wa kiwi kiwi.
Da ong u leh neiyi i daw wa na baar Constituency wan luchia chapoh kani ka thaaiñ du heipor chwa Election deiwa e poisa da ki lak tangwa lada e yarap man-u-snem tæ ymtoh u kyntait ya ka wei emkaam u man kiwa husiar wow syndong wei ymtoh u chah pynbiej ki.
Da kyntu u ya ki paidbah wow jied biang ya oo ha u 2023 khnang wow ye chooh chooh u wow yarap ya ki chnong ka Constituency sam chaphrang.
Neiliang ki paidbah leh da rai ki wow kyrchaan ya oo ha kani ka kynti.
Ha kani ka sngi da pynphooh ya ka da ki rwai wa ki chaad.
