U MLA ka Khliehriat, uwa man leh kam u Montri sorkar, u Kyrmen Shylla hawa kylli ya oo chaphang i thmu wow wanrah luti rel cha Jaiñtia Hills, da pyntip u wa da em i yachem wa ki bru yow yaklam heiyatoh wa ini wei em na ki kiwa kwah tangwa em won kiwa khuslai boi ya jia iyi iyi wym ye de u kdoh u khoom nadooh yei mantre yei thaw i bhaw wei i wan ki bru kiwa na baar iwa daw ktah leh yei kamai kajih.
Da ong u leh wa chong hei mon ki paidbah wei ym ye wow leh iwa man pyrchah yei sñiaw ki paidbah wei ymtoh leh wow dam u e yeiwa kwah ki wei u leh waroh neibynta ki paidbah.
Heiyatoh wa ki bru napoh Jaiñtia Hills, da ong u wa toh kiwa stat bha u khih wei kiwa boon leh toh kiwa em i yong ki hi i khih wei tip bha ki iyi wa emkaam yow pynku ya ka kamai kajih.
U Kyrmen da ong u wa ymtoh wow em kiwi ki wow wan pynthut tangwa toh u e laad ya ki paidbah wow rai ki, kamtæ da ong u wa emkaam wow khut ya kawi ka yalang kawa heh yow em da kiwa chong chnong donhi lada toh ha Jowai wow em du kiwa na Jowai lada ha Khliehriat wow em du kiwa na Khliehriat yow chim yei rai.
Tangwa da ong u wa lada ym lai ka luti rel nei thaw yong oo, iyi i daw wow tuklar tangwa lada lai ko toh u e ya ki bru wa em hapoh ka thaaiñ yong oo wow chim yei rai klem da wan luchia kiwa na baar.
Da ban joor u yeini wow chim rai da kiwa chong chnong kiwa tip pliah yei khih i khan ki neibhah ymtoh wow pait ya ka pliang ja yong kiwi wei lada yoh yei kyrchaan leh ymtoh deiwa pynbiej ya ki bru.
Da pynkut u deiwa ong lada ki paidbah pyrchah ki, oo leh u pyrchah u wei lada ki paidbah kyrchaan ki, oo leh u kyrchaan u.
Ini toh hadien wa ka Northeast Frontier Railway (NFR) da em ko i thmu wow wanrah ya ka luti rel na Chaparmukh, Assam hadooh ha Jowai, West Jaintia Hills wei ka luti rel u man ko uwa jrong 180 Km u wow lai na Bhoksong, Rajagaon, Baithalangso, Jengkha, Kherani wa Umrangso deiwa pynkut ha Jowai.
Discussion about this post