Jowai: Ka Rotary Club Jowai kam kawi na ki seiñ kreh mon sñiawbha wa em hapoh ka District kawa da leh chiboon ki kaam wa yatoh wei miat i bha ka imlang sahlang yong ki bru wa chong chnong, ha kani ka sngi Khyllaw 21 tarik u Naisaphra dei sñiawngooh sñiawburom ya ki kaam wa da leh da ki bru ka Police Department hajrong ka thong wow e i chakri wei yada yei poor ka khlam COVID-19 nawi chawi, da chim ki wow pynman ka yalang pynkup burom watip kam ka Appreciation & Recognition Award.
Yeini i pynkup burom ha kani ka sngi da pynman ha Conference Hall yong ka yung krehkaam u Superintendent of Police, West Jaiñtia Hills District heiwa ya ka yalang da pynlai da u Rtn. S.K.Lato, MPHF, President Rotary Club Jowai hei emlang u Rtn. Dr. Kameswar Singh Elangbam, Assistant Governor, Zone X RI District 3240 kam u kongsan, u Superitendent of Police West Jaintia Hills District u B.D.Marak, MPS, u Deputy Superintendent of Police West Jaiñtia Hills District u B. Chetri, MPS, u Rtn. S.Laloo, Secretary Rotary Club Jowai, u Rtn. M.Passah, Secretary Literacy, u Rtn. Longda Bamon, Community Service Director, ki dkhot ka Rotary Club Shillong wa kiwi ki sahep yong ka Police Department.
Kam wow kdar luti ya ki bynta wa chkhmat yong kani ka prokram, da rwai leh yei sur National Anthem neitæ pynbood won ki kyntien yahkhmat na u Rtn. S.K.Lato kam u chongknor, uwa da yaroh ya ki bru ka Police Department kiwa da chimkhia u kreh yei kamram khlem da kheiñ yei tynjooh wa wan ha ki dur ki rukom waphær.
U Rtn. Dr. Kameswar Singh Elangbam, Assistant Governor, Zone X RI District 3240 hei e kyntien da ong u ki pulit toh ki bru ki wakreh yei kaam khlem da kheiæ nae wanrah yei tæ i sñiaw yaphær heiwa i chakri yong ki ya ka imlang sahlang, i miat i bha ka chnong ka thaw, toh sakhiat i wow yoh yeini i burom ha kam ini i por iwa ka pyrthai chityllup maad ko yei tynjooh wakhroo neidaw ka khlam COVID-19.
U B.D.Marak, Superintendent of Police West Jaiñtia Hills District hawa e kyntien kaam u khlieh watoh u pait ya ki pulit hapoh ka District, da e u i sñiawngooh wa khroo ya ka Rotary Club Jowai wa ya ki dkhot yong ka waroh kiwa da pynkup ha ki yeini i burom wei da ong u leh kam ki bru wa em hapoh kani ka chnat krehkaam, boonsien man i ki bru wa chah kynnoh bar yei wa yoh i yei yaroh neibhah napyrdi ki waboon em du kajiak donhi kiwa tip wei sñiawthooh yei kamram yong i.
Chooh chooh leh chwa wow chong, e mynsien u ya ki bru ka Police Department kiwa em hei pait i pynlai yong oo deiwa ong, ha kam ini i por wow yaleh pyrchah ya ka khlam COVID-19, man kiwa da pynkhreh ya i dæ samen chwa dep neitæ yow ye wan i u yarap ya kiwi deiwa pynemkaam tikna ya ki le tylli ki dak wa ong SMS iwa mut Sanitised your Hand- Use Mask- Maintain Social Distancing.
Kiwi wan kiwa da e kyntien ha kani ka yalang toh u Deputy Superintendent of Police West Jaiñtia Hills District u B. Chetri, MPS wa u Rtn. S.Laloo, Secretary Rotary Club Jowai.
Ki bru ka Police Department kiwa da pynkup burom ha kani ka sngi toh man ki kamni:
Police Medical Team: ka Albanisha War, u Firtsway Shullai wa u Rabindra Thakur
Jowai Traffic Police Branch: Deep Khatri, Inspector Traffic, u Sayendra Hajong, u Meker Suting, u Lamiki Suchiang, u Jasen Sangma, u Debingsen M. Sangma, ka Suffiency Shylla wa u Rijuski Rabon.
