Khliehriat: Ki artylli ki seiñ kitæ ka Southern Border Youth Welfare Association (SBYWA) wa ka Jaiñtia Youth Federation (JYF-EJHDU) da pynsñiaw ki yei sñiawdiaw hajrong i e NOC ka Jaiñtia Hills Autonomous District Council (JHADC) ya kawi ka Unique Industry Coke Factory ha ka 03-03-20 hanlada pyrchah joor ki paidbah ya kani ka karkhana kawa sdang kreh ha wah Deiñling kawa em hapoh u pood u ang yong ki soo chnong wa kynthup yaka chnong Umsatai, Deinsatlang, Ladwahwapung wa ka Pynurkba heiwa ki paidbah da pyrchah joor ki ka neidaw ki waheh chnong yong ki da e NOC sop sop ki khlem tip ka Dorbar Chnong heiwa da tyngkheiñ ki ya ka Sanad krehkaam yong ki.
Hajrong ini i rukom pynlait NOC da ka EC yong u Thombor Shiwat lyngba u Chief Forest Officer, JHADC, ki ar seiñ da ong ki wot hadien wa booh ya ka ujor ha ka 24-02-20 da kawa ujor ki paidbah lyngba ka dorkhat tangwa kani ka EC yong ka u Thombor da e pathan ko ya ka NOC ha ka 03-03-20 khlem da ap de ya ka sur yong u paidbah khamtam ym em kheiñ ki ya ka chithi ujor kawa booh ha katai ka tarik, da ong u S. Shadap, President SBYWA.
Neiliang u J. Pala, President JYF-EJHDU da ong u ka seiñ hadien wa yoh ki ya ka ujor na ki paidbah heiwa da em ka Coke Factory kawa thmu wow kreh ha wah Deiñling, neiliang yong i da booh ya ka chithi ujor deiwa thmu wa ka JHADC u pyndam noh ko u e NOC ya katai ka karkhana neibhah da tip i ka JHADC da man ko kawa pait wa yoo ya ka khyndaw ka chyiap yong i katwa u yoo da man pathan ko kam kawa pynjæd pynpra donhi deiwa e NOC ya ki Factory heiwa ini ym em e myntoi ko tang kajiak leh ya ki paidbah wa chong chnong ka jylla wa ka jaitbru.
Neitæ hawa yatoh wa kani ka e NOC ya ka Coke Factory da leh khlem pynman Public Hearing wot hapyrdi i pyrchah joor ki paidbah chong chnong heiwa da suba leh wa da emktilang da ki bru wa em heibor wa na jrong wow dawa pynlait ya kani ka NOC yong ka Coke Factory.
Ki paidbah da pynsñiaw ki leh lada em kani ka karkhana, daw ktah joor ko ya ka rep ka riang, ka um baam um dih, ka chait ka nang, iwa daw ktah leh ya ki khynnah skur kiwa em ha kitai ki chnong wa kiwi de ki kaam im yong ki bru ka thaaiñ, da ong u S. Dkhar, GS ka chnong Umsatai.
Ki ar seiñ da beiñ joor ki leh ya u MDC yong ka Bataw-Lakadong Constituency uwa em ha ka EC hapoh i yahkhmat yong u Thombor Shiwat u wym yasaaid neibynta ka kaam im kaam yap yong u paidbah ka Constituency yong oo khamtam wow pyndam u e NOC ya katai ka Coke Factory heiwa da beiñ leh ya ka rukom pynlait NOC yong ka JHADC.
