Shillong: Ka Confederation of Meghalaya Social Organisation (CoMSO) da sdang biang ko ya i yakhih wow pynbor ya ka sorkar India wow pynkrehkaam noh ya ka Inner Line Permit (ILP) ha ka jylla Meghalaya. Ka yakhih kawa da sdang biang ynne ka sngi da man ko deiwa wah ya ki lama yong kiwa emlang ya i thoh dawa ILP ha kylleiñ ki District ka jylla, wei ya kani ka yakhih da sdang nadooh i por 8 waje i step, wei da sakhi leh yei pait ki pulit khamtam ha Shillong.
U President ka HANM, u Lamphrang Kharbani da ong wa i wym e ka sorkar India ya ka ILP ha Meghalaya pynyoo ko wa ym burom ko wei ym kheiñ ko ya i rai yong ka yung dorbar ka jylla kawa da mynjur lang da i jooh i sur yong ki palat 30 lak ngut kiwa chong chnong lyngba ki 60 ngut kiwa mihkhmat wow pynkrehkaam ya ka ILP kawa toh ka aiñ wow yada nei chah tyllep ha kiwi ki jaitbru.
Da ong u wa hanla ka jylla ka em ko yaka Sixth Schedule wa ka Land Transfer Act, tangwa ym pu biang wow yada ya ka jylla katkam wa lai i por, wei pynsñiaw u leh wa ka CoMSO u pteiñ ko yaka yakhih hadooh wa da yoh ya ka ILP, wei ya ki yakhih wa rap eh daw pynbna hadien ka 4 tarik u Kmaichonglad (Dec), 2020.
U Donboklang Kharlyngdoh na ka HYC da ong u wa lada ka sorkar pyrdi dang kheiñ ko wa ka jylla Meghalaya dang toh i bynta yong ka ri India, da toh wow e noh syndon yaka ILP, neibhah wa ym em de da kiwi ki aiñ wow yada nei wan tyllep ki bru wa na baar lait na ka ILP. Da ong chooh chooh u wa ka sorkar India wow dam noh u pynbiej leh sñiawbha Christmas, wei ha i jooh i por da kyntu u ya kiwa mihkhmat ka jylla nadooh u Montri Rangbah wei kamjooh ya ki 2 ngut ki MLA ka BJP ha ka jylla wow chimkhia noh ya kani ka kaam, deiwa pynsñiaw leh wa lada emkaam ka CoMSO smat ko wow synran lang cha Delhi hadooh wa da yoh ya ka ILP.
