Jowai: Ka seiñ kiwa kreh Muster Roll hapoh ri-loom Jaiñtia ha waroh ki tnat sorkar, ki karkhana ki bru samen wa kiwi kiwi ki thaw hapoh ka lama ka seiñ Jaiñtia PWD Muster Roll Workers & Labour Union ha kani ka 5 tarik da lai e dorkhat ki ha u symbood montri rangbah ka jylla, u Prestone Tynsong uwa pait leh ya ka tnat Labour Department ka sorkar jylla wow dawa wow pynyoh yei hok yong ki hapoh ar bnai.
Ha ka dorkhat da ong wa ki man ki kiwa chah yoobeiñ dooh wei khian ka nongsngi wei ym jooh man tista i rukom su bai kreh ki heijooh i por leh da ong da neh ka bai nongsngi ki kamjooh bait da boon snem.
Da dawa ki leh wa toh u yoh chuti ki neibhah ha ka chi snem da e chuti du soo sngi donhi wei ki em ki ka hok wow yoh chuti hadooh 120 sngi chi snem khlem chah khate naka nongsngi yong ki wei emkaam ki leh u yoh ya ka Paid Maternity Leave iwa mut ya kiwa dang yoh khon toh u chong yung wow pait khon ki khlem chah ah ka nongsngi.
Da paan ki leh wow pynku ya ka nongsngi ki cha ka T. 300 chi sngi iwa da dep mynjur ka sorkar jylla nadooh u Naiynru uni u snem tangwa hadooh katni da yoh ki du T. 184 hanlada ha u 01-04-2017 da pynku ya ka cha ka T. 189.
Da dawa wow pynkrehkaam ya waroh ki Scheme ka Meghalaya Building and Other Construction Workers’ Welfare Board (MB&OCWB) cha ki Muster Roll kiwa da em hapoh yong ka yow yoh ki ya i myntoi wow pynbiang leh ya ki tiar kreh ya ki da kiwa miat wa bha.
Kamtæ ynne ka sngi kani ka seiñ ki Muster Roll da pynman ki ya ka dorbar paidbah ha Dulong wow yaklam ya kani ka kaam wei da emleh u Labour Inspector ka WJH u E. Lapasam uwa da khana ya kiwa boon ki myntoi wa toh u yoh naka MB&OCWB kiwa da em pyrtuid ha ka kam ka Pension, ka Schorlarship ya ki khon yong ki, i yarap poisa hawa khlaad, i yarap poisa wow chna yung wa kiwi kiwi.
Ha kani ka sngi kamwa 1020 ngut kiwa kreh Muster Roll da psiah dkhot ki cha ka Jaiñtia PWD Muster Roll Workers & Labour Union wei da chim ya ka rai wow yang ya ka ar bnai kamwa da e por ya ka sorkar.
Discussion about this post