Ka Federation of All Teachers of Meghalaya (FASTOM) kawa pynman ya i yakhih ‘Non Co-operation’ namo i dam u krehlang wa ka sorkar hajrong kiwa boon ki mat dawa, ynne ka sngi ka 29 tarik da pynbna ko wow sangeh yei yakhih deiwa kyntu ya kiwa sikai wow uiñ biang cha ki skur yong ki.
U Andrew Lyngkhoi uwa man leh u General Secretary ka FASTOM da ong u wa ka seiñ ympu chim ko ya i rai wow sangeh yakhih tangwa da rai wow pynjem wei ini i rai toh hadien wa da booddien ya ki mat dawa na ki sahep ka chnat puræ puthi kiwa da pynche hajrong kini ki mat.
Heijooh i por da dawa leh wa ha kani ka tayaw da e por ya ka sorkar wow pynbiang yeiwa dawa dei thoh wei lada ka sorkar ym mano ko yeini hapoh i por wa da booh kiwa sikai daw pynman ki yakhih wa rap joor.
Da ong u leh wa kiwa sikai hapoh ka FASTOM smat ki wow krehlang wa ka sorkar ha kiwon kiwon ki bynta lada ka sorkar e ko dei thoh hajrong ki dawa yong ki.
