Ka JSM ynne ka sngi da thoh ko cha u DC ka East Jaiñtia Hills District yow wanrah hakmat yong oo yei sih u sarok NH-6 kamjooh i wym krehkaam ki Street Light kiwa em ha rood uni u sarok.
Ka seiñ da ong ko wa ki paidbah da maad ki yei eh neidaw wa sih uni u sarok wa em hapoh ka District uwa dap da ki thlu ha kiwa boon ki bynta iwa da wanrah leh yei ya tyrrah kari wa i mynsoo neiwa mih ma mih ki thlu wa thymme man-ka-sngi.
Da kdaw leh yei wym krehkaam waroh ki Street Light ha u sarok NH-6 kiwa da man hi-eh kam ki chrot pynriam ya i rood sarok khamtam ha ki Toll Plaza hawa emkaam ki bru wow su poisa.
Kamtæ ka JSM da kyntu ko yaka NHAI wow chimkhia ya kani ka kaam wow pynchna smat ya uni u sarok hapoh ar tayaw wei wow chna leh yaki Street Light, lym kamtæ ka seiñ daw phah pynsangeh ko yei chim poisa ka Toll Plaza wa em hapoh ka District.
Da pynkut deiwa ong wa lada leh ya ini waroh wow pynchna pynmiat daw pynduna ko ya i tyrrah kari ha uni u sarokbah.
