Ka Jaiñtia Students’ Union (JSU) Mynso Unit deiwa ya emlang u General Secretary ka JSU Shillong Circle u Request Pakma da lai pait ki ya u sarok Nartiang Jonglwid Barato Road uwa da chna deiwa kyrchaan poisa daka MORT&H hapoh ka Central Road Fund (CRF) ya kawa da tip kam ka ‘Improvement Including Metalling and Blacktopping of Nartiang Jonglwit Barato (NJB) Road (23rd to 37th) Km’.
Ha ini i lai pait, neiliang ka seiñ da chem ko ya i kreh khalær wa i kheinstiñ yong utai u Contractor uwa toh u pynkreh ya uni u sarok heiwa ha kiwa boon na ki bynta yong utai u sarok uwa dang dep chna da sih wei i rong wa dang dep siang da khoh lut.
Neiliang u General Secretary ka JSU Shillong Circle u Request Pakma da ong u wa ya uni u sakor toh u pyndep ha u snem 2021, tangwa sñiaw lyngngoh wow yoo wa ya uni u sarok wa dang dep kreh du ha ki kajiak bnai wa da dep da booh u hei eh ya u paidbah yong kani ka thaaiñ ha i lai i wan wa man-ka- sngi.
Kamtæ ka seiñ da beiñ joor ko ya ini deiwa ong wa da kreh tang dep, khlem da pyrkhat neibynta i myntoi yong ki paidbah yong ki boon tylli ki chnong kiwa em ha katai ka thaaiñ.
Chooh chooh neiliang yong u Request Pakma da ong u wa ka seiñ ym chong ngiah ko, tangwa u lai booddien ko hajrong ini i pynkreh u Contractor heiwa da e por ya oo chi bnai wow chna pynbha ya utai u sarok.
