Ka Dorbar ka Chnong Namdong kawa man haka 28-12-20 da chim ko yaka rai wa khaddooh yow paan pynche na ka JHADC lada daw pynemkaam lane u ieh noh ko ya ka Reserved Forest kawa pyrtuid Thadmynri (Raij Namdong, Elaka Nongjngi) kawa ka dorbar chnong Namdong da e sñiawbha ko cha ka JHADC wow thung dieñ wei wow sumaar ya ki dieñ Sal ha kani ka khloo.
Kamtæ da ong wa neidaw wa leh mylliñ ka District Council ya ka chnong Namdong wei i e laad ya ki bru samen wow thang rngaw, wow khloh moo leiñ wei wow rep saroo ha kani ka khloo, ka dorbar chnong da khut ko ya u Chief Forest Officer (CFO) yong ka JHADC wow wan pynche cha ki paidbah wa chong chnong ha ka 8 tarik uni u bnai, wei ha kani ka sngi ka Dorbar Chnong daw chim ko ya ka rai wa khaddooh lada daw pyndam lane u pteiñ ya ka soskular hapyrdi ka chnong wa ka District Council kawa da ya soi lang ha ka 05-07-1985 lyngba kiwa kitkaam chnong ka chnong Namdong nadooh u waheh chnong, Secretary chnong wa u Chairman chnong Namdong wei neiliang yong ka JHADC da soi da u Chief Forest Officer.
Ka chnong da rai lang ko wow yang yei por wa i pynche na u khlieh yong ka chnat khloo yong ka Council wei ha kani ka sngi neiliang yong kiwa chong chnong daw chim ki ya ka rai yong u paidbah lada daw pteiñ næ u pyndam noh yaka soskular hadien wa pynche neiliang ka JHADC.
Hajrong ini i bynta, lada u Chief Forest Officer yong ka JHADC ym ye u wow wan ha katai ka sngi wow e pynche cha ki paidbah, neiliang ka chnong da pynbna paidbah wa da pyndam yaka soskular wa da yakut nadooh u snem 1985 wei neiliang ka chnong daw sumaar hi ko ya kani ka khloo wei u pynemkaam katwa yoo biang ka chnong khamtam yow yada ya kani ka khloo yow pyndooh jait yei ah roi yaki dieñ, u rep saroo iwa da pyndooh yei heh i san ki dieñ ki siej.
Ka kyrwoh na ka Dorbar Chnong lyngba u Elias Susngi, Waheh Raij Namdong, Elaka Nongjngi.
