E por khaddooh ka Namdong wa Elaka Nongjngi ya ka JHADC wow khang yei rep saroo ki Thadmynri hapoh ka Forest Plantation

Ka Dorbar Chnong Namdong ha ka 6 tarik uni u bnai da lai ki wow e dorkhat khaddooh ha u Chief Forest Officer ka JHADC wa cha u Dy. CEM ka JHADC hajrong i wym ye ka Council wow pyndooh pyndam yei rep saroo ki bru na Thadmynri hapoh ka Forest Plantation kawa da e ka Dorbar Chnong Namdong cha ka JHADC nadooh ka 05-07-1980.

Da ong wa heipor wa e ya kani ka khloo da em chwa ki jait dieَñ Sal kiwa heh wei kiwa boon tangwa kat dang mih ki sngi ki snem da sdang wow pam khiar ya kini ki dieñ wei hadien wa jan lut kini ki dieñ, katni da ki spah ngut kiwa chong chnong ka Thadmynri da hiar ki wow rep saroo ha kani ka Forest Plantation, wei hajrong ini, ka chnong Namdong da ujor ko boonsien cha u CEM wa cha u Chief Forest Officer wow dawa pynkut noh yeini i rep saroo pyrchah aiñ da kini ki bru ha kani ka thaw tangwa ym em chimkhia yeini wot hawa dadep wow ujor hadooh katwon katwon leh.

Kamtæ ha ka 5 tarik uni u bnai, ka dorbar chnong lyngba ka dorbar paidbah da chim ki ya ka rai wa khaddooh wow ujor ya kini ki bru cha ka JHADC yow pynkut noh chisiendon yeini i rep pyrchah aiñ ha kani ka thaw chwa ka 16 tarik uni u bnai wei wow thung biang da ki dieñ, wei lada ka Council ym ye ko wow leh kamwa da yakut ha ka soskular, dang bha wow e kti biang ya kani ka thaw cha ka chnong Namdong yow pait wei sumaar.

Ka chnong da maham ko leh wa lada ym ye wow leh iyi iyi chwa ka 16 tarik, neiliang ka dorbar chnong daw leh ko iyi iyi deiwa khor hajrong kani ka khloo.

Related posts

Sñiawngooh ki manbei ka chnong Tamu ya u Sniawbhalang Dhar

May 15, 2025

E bor ka AICTE wow sdang noh ya ka Shillong College of Engineering

May 15, 2025

Chooh chooh da kdaw leh wa kini ki bru wa chong chnong ha Thadmynri da wan ki wow chong chnong ha kani ka thaw deiwa e bor ka chnong Namdong wa ka Elaka Nongjngi wei da e lang ya ki yei thaw rep, ki khoo yow pam dieñ wa ki thaw chna yung tangwa katwa dang mih ki sngi, kini ki bru na kani ka chnong Thadmynri da sdang ki wow pynsih ya kani ka khloo deiwa rep saroo wei da pynphylla leh ya ka chnong Namdong deilang ka Raij Namdong kamjooh ka Elaka Nongjngi kattæ wa kini ki bru da kwah ki wow lai cha ka Elaka Nartiang iwa da pynman ya ki wow yieñ pyrchah yeini i leh buit tooh yong kini ki bru du wow pynsih ya ka imlang sahlang, pynkut ka kyrwoh na ka sur u paidbah wa chong chnong.